肥佬黎公司發盈警好燥 粗口罵記者手尾長

壹傳媒集團的老闆肥佬黎黎智英，昨晚又惹官非，因用粗口責罵東網記者，惹來記者報警之外，又被拍攝到回家所座私家車違例逆線行車，睇怕少則食牛肉乾，大則惹官非，呢次手尾長。

昨晚維園舉行六四燭光晚會，例牌會參加的肥佬黎出席有關集會時，不知甚麼原因，突然走向東方日報集團東網的一名記者前面，用手指著記者，並以粗口責罵他近距離拍攝自己，大聲說：「我實搞你，我依家話畀你聽，我影X咗你張相㗎！......X你老母X！」，記者則不斷說：「放心，唔會行咁埋」「我地唔會，放心，放心」。

肥佬黎表現甚為燥火，在攝影機鏡頭面前，亦收不住口，不斷地出粗口責罵記者，不但失禮，一句「我實搞你」，更加過火。

肥佬黎作為公眾人物，尤其自己亦是辦報的，都知道記者為了攞料，無論拍照或追訪攞回應，都是指定動作，壹傳媒亦天天有做。而被訪者的最佳回應態度是以平常心對待，但肥佬黎卻忍唔住爆晒粗回應。難怪記者事後報警，警方將之列為刑事恐嚇，並交港島總區刑事總部重案組第三隊跟進。

此外，該集團記者還拍攝到肥佬黎離開維園回家時，所座的私家車在亞皆老街附近一度逾過雙白線逆線行車，警方看了相關片段後，亦將之交西九龍總區交通部跟進。

六月唔止有六四，6月12日仲係壹傳媒公布業績之時，唔知肥佬黎因為業績唔好所以咁燥。事關佢間壹傳媒（0282）發盈利警告，預警截至2017年3月31止年度虧損增加，除廣告收益減少外，重組所涉及的開支，及出版權減值，也令虧損增加。

壹傳媒發通告話，年內香港和台灣因經濟不景和印刷刊物市場整體下跌，集團刊物的廣告收益及發行收入減少約 23.4%﹔此外，由於精簡其業務，尤其是香港和台灣的《蘋果日報》及《壹週刊》之重組，所造成的開支，包括裁減員工而須支付代通知金為數約4000萬元。另外又要為《蘋果日報》刊頭及出版權作估值後，要減值約 2億元。

壹傳媒對上一年蝕3.2億，睇嚟呢過去一年唔止蝕咁少喎。

小鯊

** 博客文章文責自負,不代表本公司立場 **

港視主席王維基周五以校友身份返中大同師弟妹分享創業心得，話佢中五開補習社收400幾個學生，月入幾萬蚊夠俾首期買樓，又試過賣台灣水貨書都好成功，到90年代搞IDD回撥更加掂；但亦有失敗經驗，例如在加拿大賣女裝睡衣、前幾年搞電視都係失敗之作，而家網購仲捱緊。

魔童講起網購條數又幾誇吓，佢話投入網購現時日蝕50、60萬元。吓，蝕咁多？兩日就推一架賓士落海喎。計吓數如果日蝕50萬即係年蝕1.8億，日蝕60萬即係年蝕2.2億， 魔童仲話：「我做咗兩年，但我會擺多10億落去，輸晒未必再玩，但一定會做好。」

不過一個財演就咁分析，年蝕2億，再放多10億可以玩多4年，呢條數話多唔多，睇你同邊個鬥。魔童做網購同百佳、惠康鬥，人地係巨人，魔童年蝕2億太少啦，肥佬黎當年搞蘋果速銷，兩年蝕15億，一年輸7億以上，遠比魔童大手筆，都打唔低對手，魔童年蝕2億咁細手筆，而家百佳、惠康都未使回應。

魔童做網購的香港電視市值13.7億，資產淨值20.1億，咁搞法都唔係可以輸得好耐咋。