無爸媽 點買樓?

上期講到有位朋友想賣間新界樓，遇著八十後買家對上八十後經紀，經紀無料到，拉埋買賣雙方在現場講價，結果搞砸了單交易。事隔一個星期，換了一個手法比較成熟的經紀，我朋友個單位好快就成功賣出。

我問朋友的交易詳情，其實好簡單，新的經紀並無拉住買賣雙方在現場講價，與準買家睇完樓就離開，之後用電話聯絡，經紀與買家講完價後，再與我朋友講價，最後我朋友減了5萬元，就成交了。朋友話，只要冷靜點，就可以成交啦！我笑住問他，你上次好唔冷靜咩？他沒有答我，但我覺得他當時被那名八十後經紀真的搞得好不耐煩，一怒之下趕走佢。

這個情況正如我上次估計的一樣，該八十後經紀的議價手法大有問題，結果失了單生意，益咗另一名經紀。我朋友這位沽家，其實是願意減價成交的。睇番我朋友的沙田單位，以400幾萬成交，等如建築呎價9300元。一個400幾呎的單位，30年樓齡，9300蚊一呎，價錢認真貴。同上文提過的準買家一樣，呢個成功買家都係要家人幫手至買到樓。

其實條數好易計，四百幾萬嘅樓，三成首期，加埋厘印經紀佣，接接近150萬先至落到樓，仲要多10、20萬裝修，要160、170萬現金。做咗5年、10年的打工仔，兩夫婦加埋賺三、四萬蚊一個月，根本儲唔到百幾萬。依家父母幫忙頂咗個首期，自己供樓，都要成300萬。篤篤計數機，供300萬蚊樓，也不容易，以現時利息2.5厘，聞說小夫妻供35年，連本帶息，一個月要供10800元，如果利息向上升，假設按息升到5厘，每月供款變成15299元，無咗一半人工，認真唔易頂，再數吓手指，供成35年，就算小夫妻依家25歲，供完都成60歲囉。咁搞法，啲後生仔女真係供到命都無。

我們從側面可以睇到樓市有幾個情況，一、樓市有用家需求；二、樓價超過了用家的負擔能力，首期俾唔起，供款能力亦有問題，即使現時息低勉強負擔得起，利息加番2厘幾回復正常的話，供款亦成問題；三、沒有爸媽幫手，好難買樓。結果就造成社會的不公平，如果父母係中產，又有積蓄，可以幫仔女買到樓。如果父母係草根階層，邊有錢幫手買樓呢？年青人見到有人有父母幫手，買到樓，自己就買唔到，條氣點會順？條氣唔順，就發洩到政府身上啦！造成社會好大嘅不穩定因素。

政府依家有點「老鼠拉龜，無處入手」，要拉低樓價，就要增加供應，增加供應最終要有土地，但政府此前沒有預早開發土地，造成供應不足，而家惟有拼命搵地起樓，連綠化地區都話要起樓。但現今民主社會，要改變土地用途，要去區議會諮詢，一般情況下，當地居民都會在「沒有著數唔好搞我」的態度下反對！增加土地供應變成一個唔係咁快可以解決的問題。所以高樓價仍然未上車一族難言之痛。

陸羽仁

** 博客文章文責自負,不代表本公司立場 **

有個朋友最近講俾我聽有關佢嘅賣樓故事，佢谷住度氣。當中笑中有淚，可以同大家分享一下。

 

 

話說這位朋友在新界有個單位，佢覺得個市已經差唔多，於是放賣，叫價四百零五百萬。放盤後反應唔錯，有唔少用家睇樓。其中有個買家係一個八十後，同埋阿爸一齊睇樓，估計係阿爸買俾個仔結婚時用。佢哋對間樓都幾滿意，已經去到埋牙講價錢的階段。睇買家帶埋裝修師傅度尺寸，計算裝修費用，可見買家好有誠意。

 

而買家願意出的價與朋友的要價，也相差唔遠，只係15萬元。不過雙方對價錢就企得好硬，而我朋友亦唔急於賣樓，見差少少唔到價不如等等，雙方有些僵持。

 

用番我朋友嘅說話講，跟住落嚟，令人哭笑不得的戲碼就上演啦，齣戲叫做「當八十後遇上八十後…」該名地產經紀同個後生買家年紀差唔多，都係八十後，經紀見到局面有些僵持，沒有帶買家離開再傾價錢，卻拉住買家阿爸到客廳一邊密斟，見傾唔掂，又跑去我朋友處，叫佢減價，來來回回客廳兩邊走。那位買家阿爸見到經紀好唔掂，於是直接同我朋友講價。更有趣嘅係，年青買家見到傾來傾去都傾唔成，非常惱火，一聲「走啦！」拂袖而去。

 

我朋友亦相當厭煩之餘，覺得搵經紀賣樓，最主要係搵經紀去講價，免自己麻煩。如果要自己去講，點解仲要搵經紀呢？於是在心情唔靚仔之下，亦唔肯讓步，交易就此告吹。

 

 

我作為一個旁觀者去分析，四、五百萬嘅樓，差價15萬，差距唔算大。那名經紀的處理手法的確有些問題。如果他能夠在不同地點與買家及賣家議價，例如遊說個買家加幾萬，說個賣家減幾萬，幾萬元相對幾百萬元的交易，其實只係少數目，必要時，自己哽一部份，例如只收單邊佣金，單生意就可以成交。俗語都有話啦，「有食唔食，罪大惡極」嘛。而家咁時勢，做生意係食咗至算啦。

 

我唔用朋友講嘅「當八十後與上八十後…」做標題咁吮核，因為我咁樣講好似歧視八十後，八十後亦大把人好掂。不過我覺得該名年青經紀，無抓住做事嘅核心，唔知道做經紀的核心作用係乜。經紀的角色，就係代表買賣雙方傾出同意的價錢，完成交易，其他事情都係次要的。這名經紀的講價手法需要大為改善，特別係拉住買賣雙方在現場講價，大家面左左，咁都傾得成，就唔需要經紀啦！做經紀唔識講價技巧，唔會做得長。

 

年青人做事，如果知道自己所扮演的角色，抓住核心，就比較容易成功啦。