翠如BB股 假的真不了

去年04月17日時我寫了一篇文章，講藝人黃翠如爸爸黃永華控股的聯旺集團(08217)，當時聯旺剛上市後三天，上市之初一度喪升，市值衝上至177.2億元，到文章刊登時聯旺股價已急回，當日收市價8.6元，仍然有107.3億市值。當時我講聯旺相比翠如BB打工那間TVB(511)的124.2市值差不多。

我當時話：「我想提提大家，呢啲創業板喪炒股，殺人有兩波。第一波，上市之初高位追入….第二波殺人局在下跌反彈時….陸羽仁見過太多呢啲殺人局，唔想大家再輸錢。呢啲喪升股， 幕後人唔係開善堂派錢俾人，你好難賺錢走。都係睇吓好啦， 唔好落場玩呀。」

股票價格好難估，好似聯旺呢啲貨源差不多完全歸邊的炒股，走勢人為做出來，就更加難估。你睇完我去年4月那篇文，一直到7月都會覺得我啱，因為之後跌咗近3個月，7月低見4.6元左右。佢8.6元時我叫你唔買，你見佢跌到4.6元，跌咗87%，自然覺得我的建議得。

不過聯旺抖完氣之後，在7月就慢慢炒上去，一路升到今年1月，去到26元的高位。在8.6元時叫你咪買，最高去到26元，即係升咗218%，你又會覺得我的意見廢到唔廢。

世事無絕對，呢幾日一場僵屍股股災，聯旺跌到1.02元，距離26元高位跌咗96%，即使當舊年4月的8.6元起計，都唔見咗88%，得番個零頭，買咗真係喊都無謂。而家睇，舊年篇文又好似啱番。

其實呢啲只係炒股，高峰時26元，市值324.5億，市值係TVB 2.5倍，當然係假到無朋友。但股民唔理真假，只睇股價上升，合埋眼可以照買。我叫大家咪買，只係相信呢啲股「假的真不了」，你唔使知佢為乜跌，佢總會把錢從你手上搶走。你買佢係同莊家對賭，睇你工夫高，還是佢功夫高。若然有一個散戶賺到錢走，應該有另外9個會輸大錢。

聯旺跌到如今，市盈率仍然好高，佢去到3月底去年純利3055萬元，如今市值12.7億，即係市盈率41.7倍，無息派。一隻建築股俾佢10倍市盈率都差唔多啦，即係合理價錢係0.24元，唔係如今的1.02元。但現實上佢可能會升番啲，但只不過又炒高偏離合理價，你能唔能在幕後人手上搵到錢，就睇你有幾大能耐啦。呢啲股好難玩架。

陸羽仁

** 博客文章文責自負,不代表本公司立場 **

最近油價跌到七個一皮，美國原油跌到每桶42.74美元水平，創了一年低位。年初時，很多專家預計今年油價會升上60美元水平，現在油價跌到這樣，他們都要重估今年油價走勢。

油價1年圖

揸了油股的朋友要損手，但有人辭官歸故里，有人漏夜趕科場。我有一位富貴朋友，他最近就走去買中海油（883）。我問他條數點計？他說這是笨笨投資法，不會發達，但可以搵到兩餐「晏仔」。方法是這樣的，找一些大股，特別是一些週期性大股，見到佢大跌時，只要不行業遇到永遠沉淪的問題，認為佢跌咗將來會上番，就每當見股價跌得多時，就買一些。買入之後可能還會再跌到「面懵懵」，但坐它半年，甚至一、兩年，通常都會反彈回升，賺到10%或以上的回報。

我這位朋友身家很豐厚，擁有很多物業，最近沽樓套了現，錢放著沒用，買股都是一球一球的買，他說買200、300百萬元股票，博一成賺它20、30萬元，慳慳地已經夠一年的開支，買入後暫時唔得就坐吓先。他形容這是一個笨方法，不像買騰訊（700），可以見到股價嘭嘭聲上，但也不用擔心會升得多會出現無底深插。

像油價這樣，已跌穿43美元，當然，還有很大機會會插穿40美元。但他觀察國際大型外匯或者商品，下跌時通常都會越跌越急。主要是有很多人用「孖展」造了好倉。當跌穿了某些止蝕位，就會引發大量沽貨離場。大家都按市價斬倉，所以越跌越急，但大量斬倉盤會清去了沒有實力的孖展戶，剩下的都是有實力的長線持貨者。當急速跌穿大位後-，反而得到支持。

朋友說，石油也是講供求，美國頁岩油商搏命泵油，也不跟從石油出口國組織（OPEC）的規律，人家限制出口，她們卻拼命出口，便搞到油價很低。但當油價急跌到這些頁岩商無利可圖時，例如跌到45美元，很多油商要停產，試想像一下，若油價再狂跌，跌至35美元，大部份美國頁岩油商都可能要停產。油價將會重拾平衡。

所以，朋友見到油價跌會買一些，再跌又再買一些，累積一定的貨，坐一年半載，油價回升，就食糊走人。他說中海油不錯，盈利下跌也派4厘息，股價不升，也可以坐著收息。他說這個笨方法不適合資本很少的散戶，如果你要投資很多錢，又想瞓得著覺，就應該買這類股份，不用擔心會無底大跌。
陸羽仁