中海油業績不俗扭虧為盈

大市升返上去27500點，連好耐都唔郁的內銀股都開始炒作，近日在招行(3968)出業績後整個板塊升了上去。

近日又有朋友問我好唔好買內銀，例如建行(0939)，股民就係咁，建行5.9元時唔想買(7月頭的價位)，升到6.74元時就想買。

恒指差不多去番2015年28000點的高位，但成份股表現差好遠，強股如騰訊，係2015年高位一倍以上，弱股如中移動(941)，比兩年前高位仲差三成，油股更弱，如中海油(883)低高位三成半，匯控(005)在中間，接近兩年前高位，而內銀算是稍弱，好多大股仍未到當年高位。

以建行為例，當年衝近8元，現在6.74元，仍比高位差一成半，講好聽啲仲有水位走，講唔好聽是落後股。

在升市當中，會一浪一浪咁升，先升強股，到強股升得太厲害，無論它幾吸引，股民都畏高，就會轉炒落後股，而落後股升時，也要看它的基本因素有無改善。

雖然我唔太贊升股價升了才買，但內銀和2015年有同有不同，相同的是外資仍未對內銀改觀，所以佢地只會跟升唔大升，而家只是跟大市升。不同的是如今中國經濟較兩年前好，不似會崩潰，它們盈利會回升一點，但也好難期望盈利大升。但總體而言，買入內銀衰咗，勝在跌咗落去可以收4.5厘息。

講起派息，想起比較肯派息的中海油(883)，佢最近升番到9.11元，並不是因為油價升，而是因為佢業績對辦，增加派息，中海油公布上半年盈利162.5億元人民幣，去年同期虧損77.35億元，扭虧為盈。中期息每股0.2港元，去年同期派息0.12元，派息上升67%。

中海油1年圖

中海油上半年實現淨產量2.34億桶油當量，計劃年內投產的5個新項目已有4 個順利投產。上半年桶油主要成本降至每桶31.74美元，按年下跌9%。桶油作業費用連續4年成本下降。集團上半年油氣銷售收入749.4億元人民幣，按年增長36.1%。

由於外圍油價仍然低迷，中海油扭虧為盈，主要因為控制成本的結果，營運仍屬健康，未來風險仍然是油價。

回頭睇中海油去年全年業績，受國際油價下降帶來公司盈利減少及計提減值的影響，純利更勁跌96.85%至僅6.37億元。今年照目前走勢，全年盈利有機會達300億以上的水平。現價股息3.7厘，若全年加派息35%可升至5厘，若加67%可以升到6.2厘，保守一點估計，佢全年派息升至5厘應該好有機會。若低位買入可以繼續持有，作收息股也不俗。

陸羽仁

** 博客文章文責自負,不代表本公司立場 **

股神巴菲特過去唔鐘意科技股，不過去年做了Apple大好友，去年開始大買Apple，由於今年科技股大升，股神這部份持股大賺超過五成，巴菲特的投資旗艦巴郡繼續增持Apple，上季的持倉增加逾83.4萬股，增至1.302億股，市值188億美元。

巴菲特唔鐘意計唔到數的股份，對其他科技股還是大有戒心，揸住好多錢不願投資，搞到巴郡手上有超過600億美金。

個市咁高，巴郡繼續敢買的股份，除了Apple之外，就係金融股。巴郡一直係富國銀行大股東，又持有大量高盛股份。巴菲特上季最矚目的投資，是首次買入消費金融股Synchrony，買入1,750萬股，價值5.207億美元，同時悉售Synchrony的母公司通用電氣(GE)股份，市值3.15億美元。

巴郡沽阿媽換個仔，直接原因是因為早前市場擔心消費貸款風險增加，Synchrony股價今年已跌了18%，巴郡應該好清楚Synchrony盤數，覺得佢跌過籠。此外，巴郡上季亦增持了紐約梅隆銀行股份52%，增加25.6億美元。

分析巴郡增持的股份，大手吸Apple，普通注碼買金融股，巴郡買Apple應該睇住佢就推新一代手機，以及有巨額現金可以回報股東。而買金融股，主是是看好經濟前景，覺得借貸消費仍會持續，以及睇好利息上升、監管過關有利銀行的經營環境。

如果扮晒股神，可以見好銀行股。睇住香港上市的大銀行，匯控(0005)業績好似未全面穩定，勝在有20億美金回購; 渣打(2888)有錢賺，但未回復派息; 內銀上半年賺錢應增加，但外資從來不看好它們; 好似各有各的問題，但若大環境對銀行有利，都可以等佢地回吐時吸納，除渣打外，呢啲巨型銀行股無嘢好，勝在有息派，買錯咗勝在有息收，唔會死到人。

我有個老友幾年前7元買隻建行(939)，佢話都無理，年年派近5厘息，仲有乜好投訴呢? 蝕價就由佢啦。