內幕消息

散戶最鍾意跟消息炒股。我見過見好多內幕消息害死人的例子，不妨與大家分享，引以為戒。

這是真人真事。聽朋友講，佢一個小學同學Richard是一家中小型IT上市公司的中層，他喜歡炒股，每次遇到老闆，都畢恭畢敬地問老闆攞料炒股。有一次，公司即將公布業績，Richard遇到老闆，當然唔放過機會又攞料啦，老闆笑笑口同佢講：公司業績好好呀，真係要多謝同事的努力呀。與老闆分手後，Richard心想，「老闆主動向我報料，仲唔係擺明想益我？」

事不宜遲，Richard馬上call股票經紀落盤。經紀話隻股票今日已經升5%，Richard心諗公司後日公布業績，時間無多，於是叫經紀照價入貨，仲係全副身家50萬掟晒落去。落完盤，無錯，係落完盤，Richard襟機睇價，嚇了一跳，原來隻股票近兩三個月，已經由2元升上3元，升咗超過50%！他有少少畏高，但心諗老闆放料，點會有問題呢？於是心安理得，等住收錢！

兩日後，公司公布業績，賺咗2億元，盈利增長50%，屬於利好消息。不過，當中有8000萬元係物業重估的特殊收益。核心盈利其實只有1.2億元，按年計核心盈利增長沒有50%咁高，只係25%。

由於該股票之前已經升了不少，公布業績後翌日，股價朝早炒高5%至3.15元，好快就有沽盤湧現。股價掉頭倒跌3%至2.91元收市。Richard有點沮喪，心諗公司盈利按年升50%，股價無理由不升反跌？條氣唔順之餘，臨收市前大手加注10萬元，但股價第二日再跌。雖然隻股未有大跌，但陰陰地向下，股價在兩個星期之間唔見咗超過10幾%。Richard見到勢色唔對，終於唔等派息就忍痛打靶，埋單慘蝕7、8萬元。

Richard老闆係知情人士，告訴他的都屬股價敏感消息。因為這些消息買賣該公司股票，係內幕交易，屬犯法行為，其他人千萬不要學。

上市公司老闆、內幕人士，猛讚自己的公司業績點好點好，我已經聽過唔少。就算那些老闆並非存心欺騙，真心以為公司股價還會再升，但隻股票已經升了許多，無論係幾好的消息，已經消化晒，再升的空間有限。另外，做老闆的，睇自己盤生意，就好似自己的仔女一樣，永遠都覺得好叻、好掂。老闆仔可能叻，但未必係好似老闆想得咁叻、咁勁。你信晒佢啲消息（偏見），盲目入市，唔中招瀨嘢都幾難。所以話，消息，都係唔信好啲啦！

陸羽仁

** 博客文章文責自負,不代表本公司立場 **

早前同一個股壇大孖沙食飯，佢講起一單好多年前的窩輪夾倉事件，睇到股市的兵兇戰危。

 

都講緊好多年前的事，話說呢個大孖沙揸重咗一間公司的窩輪，那種是公司自己發行的窩輪，不是而家由第三方發行的備兌認股證。大孖沙揸重貨，可能係那隻窩輪七成的發行量。

有一日隻輪突然炒高，大孖沙話唔係佢做，佢初時只係睇戲。例如正股股價1元，隻輪就由2毫炒到5毫，但隻正股無郁，只係隻輪齋炒，愈升愈「唔合理」，升升吓隻輪升到1元樓上，正股仲係1元，出現隻輪貴過正股的奇怪局面，因為窩輪行使時要俾個認購價，例如俾0.9元認股，咁輪價加上認購價，即係要1.9元，但正股仲係1元，咁鐘意隻股可以用平一半價錢買正股，搶到隻輪咁貴自然係顛價。

不過大孖沙見到隻輪愈升愈顛，升到唔合理價錢時，佢就入市落盤掃貨，由1元一路掃上去，差不多不問價買，有幾多掃幾多。你會問大孖沙傻咗呀，咁貴都買?佢唔係傻，係數到貨，佢手上原本揸住隻輪七成發行量，見住當日成交愈嚟愈多，好快己等如隻輪發行量七、八成，邊有咁多貨? 佢都估到隻輪升到貴過正股，咁顛，吸引咗好多人沽空，可能想做即日鮮，博尾市插番落去，唔使交收。

大孖沙於是加入戰團，係咁掃，好快都買多三成，理論上所有貨都在佢手，但個價升到1.5元樓上，仲源源不絕有人沽俾佢，結果佢買到收市，買到2元，貴過正股一倍，夾埋揸咗隻輪發行量雙倍。

結果就慘烈啦，理論上那些沽空咗的人無貨可以交收，沽空又係犯法，佢就開價3元在場外賣貨俾人，沽空者真係輸到命都無。由於輸錢的人太多，有人找頭面人物去搵大孖沙講數，大孖沙亦俾吓面人，打個8折成交啦。

呢個故仔係真人真事，細節略有偏差，但故仔相當嚇人。所以我們在樓市又好，股市又好，見到啲顛價，千祈唔好一句「唔合理」就去沽佢，因為即使啲價真係好顛，但有人願買有人願賣就係合理，或者佢長線會更合理，但個過程可以好慘痛，你去玩沽貨，要有實力去守先至好。