中信大錳低吸

我比較喜歡轉虧為盈的股份，留意到一隻中信大錳(1091)。錳是煉鋼其中一種原料，所以同鋼鐵業相關。早幾年環球商品勁插，鋼鐵價格大跌，錳價大受影響。所以中信大錳由盈轉虧，自2012年起，5年內蝕了4年(只有2014年微購1549萬元)，業績衰到貼地。

中信大錳2010年11月上市，當時招股價為2.75元，以中國最大嘅錳生產商作為號召，當時估計2010年純利1.5億元。2011年1月高位3.05元，同年已開始插，反覆碌落0.5元左右的水平。2015年6月在中國股市大時代曾反彈至1.69元的高位，到2016年7月插到0.295元的歷史低位。

圖：中信大錳7年圖

不過，中信大錳的業績轉型期今年開始出現，今年8月公佈上半年業績扭虧為盈，上半年營業額27.5億元，增長115.3%。營業利潤有1.46億元，扭轉去年上半年虧蝕1.6億元。但由於一家聯營公司配股，導致中信大錳出現非現金虧損6940萬元，減少集團盈利，上半年純利只有7000萬元，但仍遠比去年同期虧蝕1.6億為佳，係典型扭虧為盈的狀況。

隨著公布恢復盈利的業績，中信大錳股價在8月頭炒上0.69元的今年高位，之後反覆回落，在12月頭去番0.395元的下半年低位，最近半個月一級級反彈，上番0.47元左右的水平。

圖：中信大錳1年圖

今年鋼股已大升，例如鞍鋼(347)已升上5年高位，但中信大錳比較低迷，4毫幾子可說是公司蝕錢時的股價，主要因為無人炒，所以就低迷，可以等股價略回吐時低吸。等明年2月公司公布全年業績時，估計會有上升空間。

陸羽仁

** 博客文章文責自負,不代表本公司立場 **

美國聯儲局12月加咗息，美國又通過稅制改革法案，市場上睇好美國利息前景。美國十年期國債嘅息率升上2.481厘，係近4個月嘅高位。

利息上升自然睇好靠食息差嘅銀行股，早排撞到一個投資銀行家，就同佢傾起明年是否應該買銀行股的問題，佢一個幾有趣的答案，就話睇好內銀股多個過匯控（005）。

佢話利息上升對匯控有利，匯控股價明年或者有良好嘅表現，但係佢唔鍾意匯控嘅業績上落太大，認為睇業績，內銀股的業績可測性高啲。

呢個投資銀行家，睇內資銀行唔睇細股，只睇大股，主要留意工商銀行（1398）同埋建設銀行（939）。佢話內資銀行股呢一兩年的業績只是平穩，盈利只是微升，但未來盈利情況可能會略為好轉，原因之一是息差正在擴闊中，原因之二是可能過去所作的壞賬撥備可能有回撥。

佢話，兩三年前中國經濟去到瓶頸，內資銀行作咗唔少撥備，但過去一年中國經濟回暖，企業盈利回升，這部分出問題的公司經過股權改革之後亦都回穩，所以內銀所作的壞賬撥備可能有回撥，拉動盈利上升。

工商銀行一年圖

佢睇內銀股主要睇工商銀行同建設銀行這些大股，其他中小型銀行佢唔睇，因為嗰啲中小型銀行嘅賬目可能更加古靈精怪，內藏風險。

建設銀行一年圖

而家個股市升近三萬點，接近一年高位，所有股份都比較貴，內資銀行股亦如是，以建行為例，有少少四頂現象，升到7元就回頭，輪走勢比較肉酸。但如果明年股市續升，內資銀行股升唔升，就要睇佢哋業績又冇突破啦。無論如何，內銀股有4厘以上股息，好話唔好聽，睇錯咗放埋一邊，收息都仲有譜嘅。