早兩日在報紙上寫「越秀孖寶雙翼齊飛」，話越秀(0123)同佢屬下越秀房託(0405)雙雙逆市創出新高。
昨日出席一個活動，有個同事撲過來問我，她一直想買405未追到，見隻股在我講完仲升，想撲入去買。
我估我當日講得唔太清楚，其實我唔太贊成咁高入去買405。越秀(0123)係阿媽，係一間房地產開發公司，增長會長啲，風險也大啲。而佢屬下的越秀房託(0405)，係一間房地產信託公司，買房託等如買咗一個組合的物業，佢派息會高啲，風險細啲，但股價上升時升幅會少啲，係一種悶股。
所以如果你判斷市道好，你應該買123而唔係405，若你判斷市道風險大，就買405好啲。
另外附加一層因素係利息走向，利息向下，對405有利，更多人買佢收息，但利息向上時，佢的買家會減少。呢排利息走上，本應對佢不利，但因為阿媽越秀動作多，加上每年近派息時間佢例必升突(4月10日除淨)，所以才上升。我背後的意思是要405都唔好而家買。
我同同事講，405末期息0.1775元，現價除埋息5.29元，好想買都拆開幾份錢買，例如想買30萬，5.2元買10萬，5元買10萬4.8元買10萬。分批向下買，買唔到就算。
圖: 越秀1年圖
我反而更留意越秀，佢去年全年多賺46.8%至22.6億元（人民幣．下同），派末期息5.2港仙。全年錄得合同銷售（連同合營公司項目的銷售）金額約408.7億元，按年升35.1%；董事長張招興表示，今年的銷售目標為550億元，按年升35%，而2020年的銷售目標則是800億元以上，爭取達至千億元。
越秀話想在內地出多隻房託，就係想將自己的商用物業沽俾新的房託，套現進取一些投地賣樓。越秀現價稍高，不宜高追，現價近1.9元，回到1.7元可分段吸，佢係一隻可以見低吸納，慢慢儲貨的股票，長揸睇到2020年。
陸羽仁
** 博客文章文責自負,不代表本公司立場 **
大市雖然還在調整格局中，但有很多個別股份走勢甚強，衝上高位。美女G君兩年前買了金蝶國際（0268），最近食糊。她星期三whatsapp問我說，「金蝶近期不停地升，現價5.76元，已見兩年新高，你估有無機會過6蚊，我有貨，心旭旭想沽，但股價又似上緊。」
G君問完，我未答。她轉頭又whatsapp我說，「我估你會叫我沽一半先。」後來我答她，真的叫她「先沽一半貨，食一半，留一半」。
圖: 金蝶國際一年圖
結果她於星期四以5.85元沽了一半貨，這批貨是兩年前聽了我的報上講到金蝶國際的生意後去買的，平均價4.19元，現時沽出，有40%回報。金碟在2015年大時代，曾上過6.41元高位，之後回落。我在金碟回吐時提過此股，她就買入。現時賺錢當然高興，該股在2016年中曾經跌低至兩元多，跌得也很深。
講這個故事，主要想講兩點。第一、沒有人知道股市會升到幾高或者跌到幾深，所以要買入一些有質素股份，即使回落，也會回升上去，金蝶就是這類股份。如果買入一些無厘頭炒股，最後可能渣都無。
第二、G君猜到我會說先沽一半。原因很簡單，股價上升，沒有人會知道頂位在那裡，既然要看大市走向和，也要看個別股份的因素。預測股份的盈利前景，還是有比較靠譜，而大市走向與宏觀利息前景和資金流向有關，可預測性更低。
我對不同的人有不同建議，比較年青的股民，可以勇進一些，覺得還有得升，可以繼續持貨，博股價可以再升高一些。而年過40，步入中年的人，尚餘搵銀的日子相對減少，花錢的日子仍然長遠，所以，買股策略要保守一些，買股有錢賺，就算不全食，也要食一半。由於股票可升可跌，股價再升，可能覺得有點遺憾，賺少了。但一旦跌下來，起碼食了一半，有利潤在手，個心都暖啲。
圖:碧桂園五年圖
美女G君過去亦跟過我的建議，以4.45元買入碧桂園（2007），升27%在5.65元沽了。碧桂園最高上過19.1元，最近回落至14.58元。我仍然覺得G君沽早了無壞，始終有錢賺。而我的另一位會計師朋友F君，也是聽了我的建議，在兩三年前買入恆大地產（3333），入貨價也是4元左右，恆大股價升上10元時候，他聽了我的意見，只沽出了一半。其餘的一半貨留到如今，恆大現價23.1元，收穫甚豐。他說或許會再沽一半，保留四分之一，因為已有近5倍的利潤，點都要食吓糊。
圖:恒大五年圖
我建議大家買的都是大中型股份，衰的時候可以坐貨死守，好的時候可以部份食糊、部份持有放飛機，這樣買股即使不是短期賺錢，長線也可以獲利，不會輸錢。又例如中航科工（2357），跌穿5元之後，我一直叫人留意這隻股份。
圖: 中航科工一年圖
軍工股與內房股不同，民企內房股此前跌得更殘，炒起來也更兇，國企軍工股沒有跌得那麼深，也沒有民企那樣大的炒作衝動。中航科工此前反覆穿底，低見3.6元。不過，最近又浮出水面，回升至5元以上，星期四見過5.27元。有朋友問我什麼位食糊，我同樣建議有錢賺就沽出一半，留一半貨再看看無妨。
