週期

好多打工仔問我打工上位之道。這幾十年來，我見過好多人成功上位，也見過不少人上位後，坐唔穩，跌番落嚟。有些觀察，可以和大家分享一下。我們可以將一個人看成一隻股票，好多人看自己這隻股票，不是盲目樂觀，就是過份悲觀，或者是過份睇重個股的表現，而忽略了更重要的大市走勢。

打工上位，我們可以看看朋友的朋友Leo的例子。Leo在20多年前大學畢業，加入了一家外資的食品集團工作，由見習市務行政人員做起。這也是他讀書時的夢想，在一家外資大公司的市場部，搞市場推廣計劃，推銷快速消費品。很幸運地，他所屬的銷售隊伍，每次引入母公司的產品，基本上隻隻都賣得好好，灸手可熱。由於業績彪炳，Leo好快便成為公司的high flyer, 十多年來，升職加薪，扶搖直上，最近已經坐上市務部第二把交椅。公司中人一直這樣看，部門老闆一旦退休，一哥位置非Leo莫屬。

不過，最近一兩年，眼見老頂退休在即，形勢卻有點每況愈下。業績不前，市務部由過往的天之嬌子，變成財務部「捽數」的對象。今天的Leo，與5年、10年前，那個意氣風發的樣子，已經大不同，成熟有餘，但已經沒有了那份鬥志。甚至連他自己都好懷疑，公司已經不再像往時般看重他，過兩年老頂退休，自己能否接到他的位置。

摸住酒杯底，回想當年，他對大約五、六年前，推掉了一家外資中型公司請他做市務部門主管的offer，頗為後悔。他當時的想法是，自己在這家大公司順風順水，不用幾年，已經可以坐上部門主管，沒有理由考慮加入這種中型公司。現在回頭想，如果當年轉了公司的話，今天環境可能好一點吧。

Leo酒後經常大嘆，畢業以後，在這家公司工作，一直以來，一帆風順，為何近幾年卻變得很不順利，事業呆呆滯滯。我發現他沒有看到一個關鍵問題：週期。所有事物都有週期，正如聖經傳道書所講，栽種有時，拔除有時。其實，生活中、工作中，也有著許多的週期。

Leo此前之所以一路向上，其實是坐著一個好大的週期。七、八十年代，香港經濟剛剛起飛，對快速消費品的需求非常殷切。開始的時候，港人不捨得消費，至九十年代，消費力才逐步增強。以Leo公司為例，所進口的產品在外國已經非常成熟，又有公司的雄厚實力支持，只要消費市場發展到某一地步，唔使點推，產品都可以自己行。Leo之所以咁掂，其實只是坐著這個大浪，一湧而上，與個人能力的關係不大，只是Leo不知道，還覺得自已搞的推廣計劃好得，好成功，所以大賣，將榮耀全歸自己而已。

不過，近這十年，香港經濟已經成熟，消費品無論是種類或者產地，都比較多元化，有比較高質素商品，售價較高的，也有普通的，而售價也比較低廉的，加上759這類新銷售連鎖供應低價日韓貨，供過於求，競爭愈來愈大。輕輕鬆鬆就能夠做出可觀業績的日子，已經一去不復返。更重要的是，十年、廿年前，外資公司以香港公司作為龍頭，主導內地業務。現在時移世易，國內市場變得無倫的大，國內的管理人已經成熟，不少公司已經將香港業務，撥歸內地人管理。Leo看不到這個變化，卻只看著自己台戲，業務以至前景當然愈來愈縮水啦。

這個故事教訓我們，生活以至計劃自己事業，要帶點宏觀角度，要睇大趨勢，衡量自己的能力，了解自己的缺陷，如果能夠食住大趨勢、大浪潮，一、二十年，將不會有大問題。不過，要記住好多時成功全賴食啱這個浪潮而已，當越過了浪頂，便會向下滑，早有準備，才不會貪勝不知輸。

陸羽仁

** 博客文章文責自負,不代表本公司立場 **

有不少網友叫我多寫人生上位的故事，讓他們學學嘢。陸羽仁聽到故仔多到數唔晒，有上位的，也有落位的，可以分享很多故事。

這個故仔是在一間大公司發生，由於想保護當事人，所以人名及細節並非事實，但關鍵情節寫實。呢間公司Marketing阿頭Louis，人事加監察部阿頭Linda，兩個都係洋人。Linda兼監察各部門開支的職能，為人幹練，自稱做嘢咁耐從未犯錯。Louis人緣不俗，但為人有點古惑。Linda下屬Sian經常報告Louis部門有啲古靈精怪嘢，那裏出問題說不清，但總覺得有啲唔妥。

不過Louis同Linda由唔同部門眼超超，變得愈行愈埋。有一次好多同事一齊出埠公幹，Sian發現老細Linda借啲意話唔喜歡A酒店，就丟低同一部門的同事，去咗住B酒店，Sian後來同Marketing的同事傾起，發現佢地阿頭Louis又係自己住咗B酒店，就發覺有啲唔對路啦，不過佢諗Linda同Louis都結咗婚，唔會有嘢啩。

女人的直覺好強，Sian愈睇愈覺得唔妥，試過有一次同佢地兩個一齊開會，暗中拋枝筆落地下，執筆的時候睇吓枱底會唔會發現有兩隻腳交疊在一起，結果雖然無發現，但佢疑心不止。因為Sian過去一發覺Louis部門有乜問題，報俾老細Linda聽，Linda都會落力查。而家再報告Linda，佢就愛理不理，甚至叫Sian唔好咁多事。久而久之，Sian同老細Linda都搞到面左左。

火山終於爆發，有一次三個人一齊開會，Sian覺得Marketing有單推廣活動採購贈品的價錢好有問題，在會上提出，Linda幫埋Louis，話唔覺得單嘢有問題，Sian氣上心頭，爆咗句:「唔知你兩位係唔係在床上傾掂晒!」講到咁，自然無好下場，Linda逼Sian辭工。Sian返咗祖家後，愈諗條氣愈唔順，向總公司投訴，總公司專門派人嚟香港查，就查到Louis原來有私幫生意，在外面開公司，賣貨俾自己部門，做到風生水起。公司高層震怒，Louis同Linda兩個人都炒晒。

呢個世界唔使等患難都見到真情。兩人被炒後，Louis即飛Linda，原來Louis呢個古惑仔，明知自己咁搞，Linda的部門遲早查到，就去上咗Linda，做自己的保護傘。呢段「情」，只係建基在實利基礎上。

最慘的是Linda，本來係正經人，被炒出來，個名在行內臭咗，兩三年都搵唔番工。但Louis出去就打正旗號做老闆，啋你都傻。千祈唔好信善有善報、惡有惡報呢啲「民間傳奇」式的信念，現實上壞人唔一定有惡報。

 

宮心計唔係女人的專利，宮心計的男人大有人在。職場險惡，你唔搵公司水，有人會搵公司笨，你老實，人地就當你老襯。先唔好諗向上爬，起碼唔好向下跌呀。