最近有位老友去澳門搞生意，話當地截的士好難，「黑的」當道，濫收車費的故事多不勝數。
佢話中午由新口岸去關閘，截的士，司機問佢去邊，佢講完「去關閘」，司機開口要300蚊，朋友覺得太離譜，還價都唔還，行5分鐘去對面馬路永利酒店，搭免費的「發財車」去關閘就算。這是「講唔掂數」的個案。澳門人對此見怪不怪，話叫價300元不算最離譜，叫價1000元都有，有啲大陸客趕時間，1000元都照俾。
朋友跟著遇到另一個例子，一日之後，佢返咗香港，半夜搭兩點半船再過大海，去到3點半，出碼頭時仲要落大雨，半夜無「發財車」，無得揀唯有搭的士，見到幾架吉的士，冒雨行埋去發現無司機，回頭看有4、5個司機大佬聚埋一邊煲煙食雞翼，有個大佬出來問佢去邊，佢答新口岸，對方就話100蚊，朋友心諗而家唔同日間，無發財車無其他選擇，一定要搭的，個心怯一怯，當然唔會同上一日咁型調頭走，馬上還價50蚊啦！
帶頭大佬唔想接單，但調轉頭問50蚊去新口岸有無人做呀？有個肥仔仲含住隻雞翼，答口話「我去」，就跑上車，朋友鬆一口氣，心諗「乜車都無100蚊都要搭，講價講到50蚊都好大成就囉。」欣然上車去也。
朋友講完呢個經歴，除咗講澳門「黑的」離譜之外，仲問「我都無得揀一定要搭的，點解對方仍然肯減價？」我就話「你有所不知，你只從自己角度諗問題，無換位思考，你係無得揀一定要搭的，對方又有無得揀呢？
朋友搭的船是2：30，下一班船是4：00，呢班船客唔多，做唔到我呢個朋友的生意，佢地呢個半鐘又白坐，所以我朋友覺得自己無得揀時，對方亦無得揀，50蚊唔殺，好可能係0。用經濟的術語，朋友搭車的需求無彈性，司機開價開得貴佢都要搭，但同樣地司機的供應亦無彈性，啲客俾幾多都要做。
我從呢個例子講換位思考的重要，一般人都好似朋友搭車咁，睇住自己的需求決定出價，無從觀察對手來出價，佢50蚊搭到車只是好彩反應快，否則人地開300元佢都要搭。
同樣道理，我地做嘢有無從老細角度出發，睇吓佢要乜， 在佢需要的時候提供服務俾佢，到年底同佢講數講加人工都易啲。我識得一啲伙記，唔係無能力，但只從自己情緒出發，心情唔好就去老闆處，扭加人工扭升職，唔知老闆當時可能追數追到頭痛，唔得閒啋你，更加會將你總結為無用員工，幫唔到佢手。記住打工時，換位思考十分重要。
陸羽仁
** 博客文章文責自負,不代表本公司立場 **
最近見到蘋果股價再創新高，有些感慨。我是喬布斯教主fans，睇著教主過身，庫克上場，做蘋果公司行政總裁，對蘋果無晒幻想，但它的股價竟然可以再創新高，庫克都算成功了，細心思量，點解他可以做得到？
喬布斯過身之後，大家都不看好蘋果的創意及執行力。回想當日，教主可以講是癲的。他有了一個意念（idea），便無日無夜地逼屬下團隊，一定要做出完美產品。例如iPhone屏幕玻璃，要金鋼玻璃，一定不可以刮花的；iPhone的設計，只用單手，便能操控自如；屏幕觸感也要非常靈敏流暢，一無窒礙。真的逼到他的團隊命都無！凡此種種，每件產品，都是革命，表現出無限創意。
喬布斯之後，大家都不睇好庫克。大家都覺庫克創意不夠，即使有些點子，也不能像喬布斯那樣，能夠逼下屬在一日內完成一個月的工作。事實上，大家的估計正確，庫克的確如此，蘋果產品，失去光芒，新品面世，再不是喬布斯年代那麼，讓大家「嘩」的一聲，驚喜不絕。蘋果產品的市場佔有率，亦不斷下跌，先被三星佔去了好大的市場份額，之後亦被其他比較價平質佳的產品搶食，例如小米機或聯想機，便搶佔了好大部份中國的市場。
既然蘋果市佔率下跌，點解股價還可以創新高呢？從股市角度看，美股繼續炒，雞股都炒得天咁高，蘋果這樣的大隻現金牛，雖然市佔率少咗，盈利增長慢咗，仍然好賺錢，第二季盈利77.48億美元，市盈率也只有16.9倍，未算好高，股價自然創新高啦。
我們可以從打工的角度，去分析庫克正在做些什麼。庫克是一個聰明人，他知道自己沒有喬布斯的能力，所以沒有做喬布斯所做的事情。庫克不會勉強自己大玩創意，無要求好快地推出新產品，所以蘋果產品週期，比以前長了很多，事實上。自喬布斯死後，至目前為止，基本上沒有什麼大突破新產品問世。至於傳聞即將推出的智能手錶得唔得，仍然有待觀察。
庫克只好做自己擅長的事情，就是管理，管理資金，管理投資者的期望。在喬布斯年代，蘋果手持巨額現金，不想派息，也不會回購公司股票，有人叫他回購股票，他會罵你是傻的。而庫克則從善如流，增加派息同回購股份。這是取悅投資者的行為，但既然賣不到創意及執行力，告訴投資者你會聽取他們的說話，會回購支持蘋果股價，在這樣旺的市場，這種務實策略一樣OK！
或許有人會話，咁搞下去，蘋果公司，還會有長線生命力嗎？從公司長遠發展來說，的確有問題。但大家要知道，美國企業的CEO在職年期，平均只有2.5年，只要這2、3年做得好，水漲船高，自己的share option就好有價值啦，4、5年後公司會係點？真係關人個關啦。
從庫克的經驗，我們可以看到，打工最理想的當然係周身刀，把把利。但當你明知自己不是這種天才，就集中火力磨利一把刀，就像庫克一樣，他只做一名低調的執行者，集中做市場要求他做的事情。在很多數情況下，只要一把刀夠鋒利，已足夠讓你成功，由低處爬上高位。大家可以見到庫克掌控全球最大市值公司，都是用這種方法就足夠生存。大家在普通公司打工，磨刀一把刀就夠殺啦。
