金絲雀

佔中運動愈搞愈大，港股也跌個不停，國慶期間與朋友食飯，朋友問現時是否撈底的時候。我問他是否經常炒股，他說一年買一兩次。我答道，不是經常炒股，便不要撈了，撈完反彈你又唔識走，再跌就中招啦。

我給朋友說了一個經典比喻，以前在煤礦坑洞內工作很危險，因為礦洞時不時會釋出有毒氣體，由於氣體好多時是無色無味的，當時科技又不發達，令到採礦工人防不勝防。後來有人想出一個方法，就是在礦洞內養一隻金絲雀。見到金絲雀出事死了，大家便知道有危險，可以及早疏散逃命。目前，這隻養在港股坑洞裡的金絲雀，已經死了，大家要留意當中的危險性。

大市跌得多，便會反彈，恆指從高位已經下跌超過兩千多點，局面一定少少，出現反彈不足為奇。但是，究竟大市是否已見了底，往後一路向上？抑或只是略為反彈，例如幾百點，便會再向下走呢？這是長缐投資者撈不撈底的根本判斷。正如我之前所講，探測股市的金絲雀已經死了，我覺得港股未跌完。由於想出貨的人不少，彈完之後，會再度尋底。

有人問，陸羽仁你經常講政治事件長線而言，不會影響股市，不用太緊張。在一般情況下，這是對的。但我恐怕佔中事件搞得實在太大，已經不是一般的政治事件，勢將影響到股市。主要原因不是示威者堵塞馬路，即使堵塞馬路一兩個月、甚至兩三個月，對經濟長期影響相對也是輕微。我的擔心卻是，事件將激發中央做出強硬的回應，例如停止自由行、暫停滬港通，以至收緊以前許多惠港政策，這將對香港經濟做成即時煞車的效果。

有人將佔中事件比喻成「沙士」。我覺得情況比「沙士」更壞。「沙士」期間，人們很害怕，怕疫情擴大，怕大家都染疫玩完。我當時卻建議人買股票，因為買了股票，疫情如果擴散，大家都無命，輸錢也沒關係，死了無知無覺。

相反但如果幸運地疫情受到控制，大市見底回升，買了股票便OK。換句話說，買股輸錢的痛苦，你感受不到，而買股贏錢的快樂，你卻享受得到，何樂而不為呢？佔中事件不同於「沙士」的地方在於佔中不像沙士一樣，有Double or nothing的特質，即不會全盤散掉或短期內雨過天晴。佔中幾時佔完，是一個問題，隨時持續三五七個月，即使佔中結束了，其對中港關係造成了長期而且深遠的壞影響，要修補也不容易。

我覺港股這個煤礦洞正在漏出大量毒氣，大家不要當無事發生。持貨比較重的朋友，見大市反彈，應該趁機沽貨，不宜入市撈底。投資的我，要等個市壞消息出盡啲，插得狠啲才好出手。

陸羽仁

** 博客文章文責自負,不代表本公司立場 **

佔中行動持續，本來唔喜歡在陸羽仁的專欄講政治，但影響到大市的事唔講唔得，希望大家純粹用睇財經的心態觀之。

今期想講滬港通，踏入9月，個市本來已經隨著美元強、港匯弱而腳軟軟，唯一的支撐因素係10月仲有滬港通。如今又來佔中，大家仲話「唔驚唔驚，滬港通喺大廰」。我見到這種局面，開始有少少擔心，就搵個熟悉內地政情的高人問吓。

問題係滬港通係唔係仍然會準時在10月下旬開車? 會唔會因為香港上晒街就停一停滬港通罰一罰香港? 高人話，阿爺不至於罰香港，但中央首重金融安全，滬港通是重大金融改革之一，推出時不能有失，但香港政局動蕩，港元回軟，股市急插，究竟金融穩唔穩定，安唔安全? 萬一推出時香港金融狀況再變壞又點?

高人話，佔中如何發展未知，阿爺尚在商議應對策略，如今不是說滬港通一定會變，一定不通，但相反地不要假設它一定如期通車。如今已由確定如期通車，變作存在變數，未能確定。

聽完高人咁講，真係有少少擔心滬港通翻車，我就當開車與否是五五波，都不能當實開車咁睇。

2007年溫總推港股直通車，恒指炒上32000點，結果車開唔成。今次唔係咁黑仔，呢架變相直通車，最後又翻車啩? 滬港通是國務院推的金融改革，由李克強總理揸旗，但講到政治大局，還是習主席說了算，滬港通不是習主席的BB，佢點睇，「你懂的」。

呢啲市道，已經插咗咁多，隨時會彈一彈，但買股搏反彈，唔易捕捉。揸住插到殘的平股無辦法，但若然揸住貴股就要小心，例如剛上市炒到貴一貴的新股，有糊要食，否則個市一轉，真係好難走架。