扑暈自己

上星期有頭條網的網友myself問咗我一條問題：「陸SIR，小弟想請教，如要現價夾硬買兩隻股票，買完扑暈自己10年，要求有一半機會以上，平均一年股價連股息有10%回報，仲要最多買貴左，唔會買錯左個種，可以推薦兩隻股票嗎？謝謝。」

我就答咗佢一個好長的答案，附在這篇文章後，有興趣你們可以自己睇。不過，他的提問同我的答案，包含了一啲投資理念，我想在這裹講講。

佢的問題其中一個焦點，就是買一些股票，然後扑暈自己10年，希望10年後發現，每年平均有10%的複式回報。如果按數學上來計，每年有10%回報，複式增長，如果開始時候投資100元，去到10年之後就應該有260元，即係增長咗160%。

睇落去好似唔係好難，但實際不如你想像中咁易。Myself想扑暈自己，其實係針對緊散戶一個好大的弱點，散戶買股票好鐘意出出入入，考眼光，希望可以買到一啲短期內暴升的股票，買一變十。但現實上好多時散戶既搵唔到呢啲股票，亦捕捉唔到時機，如果唔係買咗一啲殺人股輸到仆，就係錯誤的時候買股，高揸低沽。

所以好多時候欲速則不達，出出入入，結果得個吉。反而有些股買咗放埋一邊，只要隻股票好的話，長揸有著數，所以扑暈自己的概念，好值買股票、特別係想買股票長的揸的朋友參考。長揸好股，減少出入，至少有一部份投資是如此。

我答Myself時候，提到有兩隻股，以前巴士的報的專欄都講過，一隻係133招商中國基金，一隻係405越秀房地產信託，點解揀呢兩隻股，原因都係因為佢哋有比較深的資產折讓，即係話你用緊1元可能買到接近2元的嘢，它們有咁深資產折讓的原因，可能是人們不太睇好整個中國市場，也有可能是不太睇好隻基金內藏的資產。總而言之，如果唔出大問題，市場感覺好番啲的時候，這些股份的股價相對資產的折讓會大量收窄，等於股價會向上。這種情況，揸上3、5年就有機會發生。

除咗呢兩隻股票之外，仲可能有好多隻股票都係有比較好的投資價，我不再一一細談。反而我想講叫大家留意一個宏觀的問題，我哋買股票，希望10年後有比較好的回報，主要考慮兩個因素，一個係果隻股票本身的因素，同埋所在地區的經濟，是否有比較長達而穩定的發展，第二個因素是我們是否在比較平的時候買入個隻股票。

若在美國、中國和香港三個地區揀，我估未來十年中國的長線的增長會比較快。中國有機會較長期保持到6﹪以上的 GDP增長，香港和美國可能只有3﹪。若講股市，內地股市市盈率12倍左右，美股16倍，所以又係中國股票較便宜，包括香港上市的 H 股，若要買扑暈自己可以長揸10年的股票，可以從這個方向揀，短期未必得，長遠應該 OK。

附陸羽仁當日對Myself提問的答案：

「Myself:咁耐無見你，答你長啲。

你的問題有三部份: 第一，投資10年，1年連股息有10%複合回報。第二，最多買貴咗，唔會買錯咗。第三，有50%機會達成此目標。

你話「只會買貴，唔會買錯」，即係要求安全，唔好買到執笠股、暴跌股(如電盈)。呢個都係幾高要求。現今世界變得太快，呢個要求唔低。買中間安龍就喊都無謂。

講啲阿媽係女人的答案。想要年回報10%，在呢個美國10年債息2.3厘的年代，係高要求。我估要高增長地區先有機會，香港就近就係中國。

一隻經常講的股票越秀房地產405，揸10年有機會。道理好簡單，佢現價3.84元，但市帳率是0.66倍，買佢等如買樓，即係100元的樓，用66元賣出來。息率7.2厘，係唔正常地高，派息比率114%，派息比收入更多，由大股東貼咗啲出來，計佢正常派5厘。派息5厘，加上每年有5%股價增長，10年複式增長，就達到你要求。

換言之，若然股價上升，市帳率由而家0.66倍，升到1.06倍，就有年均5%股價增長，即係話即使10年405的物業(主要係廣州IFC)樓價唔升，只要股價追番上資產值，都可以達到年均5%股價增長的要求。等幾年等市場對中國股票信心恢復時，有機會做到。而且我估10年廣州IFC樓價唔應該無升，而係應該升值一倍以上，換言之，揸405揸10年，有機會超標。達標機會有80%以上。

第二隻是之前講過的133，招商中國基金，派息3.6厘。即年均股價上升6.4%就可達標。即係10年後佢股價升86%。佢而家市帳率0.52倍，即100元資產用52元買到。折讓咁大除了市場氣氛唔好，亦因為佢揸重的資產主要係金融股，招商銀行、興業銀行和中誠信託加埋佔佢54%資產，特別係中誠信託有啲風險。假若呢啲銀行和信託資產無事，唔使資產升值，只要佢股價升番到市帳率1倍，股價都升92%，可以超標。若然無事，10年佢資產應唔止升1倍，可以係升2、3倍，若有1倍市帳率，等如股價升4至6倍。但亦要明白此基金風險比405高。

第三隻是指數基金，若嫌恒生H股基金2828太偏重銀行股，A50基金2823也是基礎太窄，可選滬深300指數基金，如標智滬深300基金2827。但2828好處是H股，有2.4厘息(正因內藏銀行股多息率較高)。

綜合而言，一個組合50%買405，25%買133，25%買2828或2827。目標是年均10%回報，風險是買重中國。但美股咁貴，真係買唔落手，唯有博中國啦，我估中國都有70至80%機會得。」

陸羽仁

** 博客文章文責自負,不代表本公司立場 **

最近看了一則關於盈富基金（2800）的新聞。盈富基金誕生接近15年，1999年11月12日以13.8元上市，至上月底止，股價累積升幅72%，連同股息的總回報，達到173.5%，每年複合回報接近7厘。盈富表現遠勝許多股票，也跑贏樓市。

很多人都覺得，投資盈富等於買恆生指數，有點笨，不如買個別股票。但睇番當年流行的股票，例如匯控（005），近15年的複合回報只有3.7厘；再睇近期股價比較理想的和黃（013），同期複合回報也只有4.9厘，都比不上盈富的7厘。如果不幸買了香港電訊，即現在的電盈（008），已經係水瓜打狗，唔見一大截。

固然，也有股份是跑贏盈富的，例如「兩電一煤」。以表現最突出的煤氣（003），同期的累積增長便高達5.6倍，大幅拋離盈富。雖然有個別股份可以跑贏盈富，但很多當年的流行選擇，都跑輸盈富，即係話，瞌埋眼買隻指數基金，好大機會好過揀股。大家不要看近年樓價升了很多，原來買盈富仍然比買樓賺得更多。如今樓價比99年升幅達150%，仍沒有買盈富基金賺到173.5%賺這樣多。

有人話，散戶買股，唔識揀股，跑輸盈富，一點也不出奇。大家不妨睇睇基金經理，亦唔見得成績好標青。據工聯會最近做的調查顯示，去年有86%強積金底下的基金，都跑輸盈富基金，盈富去年有13.3%的回報率，許多強積金基金的回報都達不到這個水平。即係話，不但散戶不識揀股，許多基金經理也一樣不懂揀股。

這個慘痛現實，告訴大家，揀股要跑贏大市，殊不輕易。我們經常誇大了股場上的成功例子，誰人買什麼股票，又賺了幾多，諸如此類。事實上，大多數人，包括許多叻人，買股票，都叻唔過大市，大家看強積金的表現就知道啦。所以，唔識買股，最好嘅選擇還是買指數基金，不斷買，不斷累積，特別是在大市由高位回調得比較多的時候吸納，這是最「笨」、也是最可能在長線獲得良好回報的方法。你或者會問，盈富還可以可以買呢？恆指目前的市盈率11倍，仍然低於30年的平均值。以長線睇，仍然是一個可以接受的水平，可等它有較顯著回調時吸納。

現時，恆指成份股一半是國內股票，一半是本地股票。而本地股票有相當大的部份是做地產生意的。如果你對國內長遠經濟發展的信心，大過香港房地產市場的話，便應該買國內的指數基金。比較流行的是安碩A50基金（2823），或者南方A50基金（2822），它們的成份股數目較少，如果想要更能夠追蹤國內指數的走勢，選擇滬深300指數類別的基金，會好一點。我覺得長線而言，中國經濟是可以的，長期累積滬深300指數基金也是一個投資指數方法。另一個選擇是香港的恒生H股指數基金(2828)。

有人話怕中國經濟唔得，唔敢買中國指數基金。如果你對中國經濟沒有信心，那麼，對香港股市和樓市股市也不應該有信心。因為中國經濟唔掂，香港樓市股市也同樣無運行。