滬港通開車失利，搭客稀疏，特別是南下買港股列車，差不多空無一人，搞到證券行稱滬港通為「幽靈列車」。
滬港通唔熱，與中港股市唔夠熱很有關係。現實就是這樣，跟紅頂白。愈熱的股市會更加熱，冷的股市繼續冷。同一件貨色，在不同市場，也會有不同價格，看看不同股市的市盈率就知道，港股H股預今年盈利的市盈率7倍，上海A股近12倍。睇番美股，標普500指數市盈率接近19.1倍，杜指16.8倍，納指24倍。睇市盈率，便可以見到美股標普500指數股貴過香港H股1.7倍，差好遠。
正如股神巴菲特經常講的，我們購物，會等到百貨公司大減價時至去買，不會在加價時購買。但買股票的人通常剛剛相反，價錢愈貴愈去買（買樓亦然）。當價錢便宜的時候，反而不會買。
便宜，總有便宜的解釋。中國股市便宜，外資唔買H股，講出來的主要原因是擔心中國經濟的增長動力。對上一個階段外資擔心中國樓市、影子銀行爆煲，現在爆煲機會減低了，轉為擔心中國經濟放緩。這個世界，所有事情都是相對的。對美股貴國企股便宜現象的解釋，不宜信到十足。因為凡有現象出現，總有人提出某種解釋。究竟這些解釋是否就是真實的解釋？有時值得商榷。
我覺得美股貴、大陸股便宜的原因，主要係美國泵了很多水入市場。之前美國放了水，經濟唔郁，股市升得唔係好勁，當經濟開始起動，即使未係好勁，但股市已經「把把聲」咁升。美國投資者始終熟悉當地市場，買番美國股票也很正常，特別相對於歐洲及日本經濟，美國經濟確實好一些，美國公司表現也好一些。所以美股上升，與放水很有關係。
放水放出個資產增值，資金在美國市場比較容易賺錢，自然沒有需要流向新興市場。有很多新興市場，例如以商品經濟為主的俄羅斯及巴西等，經濟又的確很差，也影響了投資者對新興市場的印象。
不過，如果比較中國及美國經濟，大陸經濟雖然放慢，仍有7%增長，美國經濟即使加快了，但也只有3%的增長，兩者仍有很大差距。大陸股票是否真的如此差，美國是否真的如此好，長線而言，我覺得不一定。
結論係，炒中短線的話，炒美股比炒港股好，美股升咗咁多，等回落5%，入貨建倉，搏炒一段，這是聰明人的做法。但如果睇中長線，例如三、五年以上，我覺得香港H股，比美股好得多，原因始終都係便宜。H股7倍市盈率與標普500指數的19倍市盈率比較，大家一齊跌，H股能夠承受風險的空間會大很多。如果你是中長線投資者，又唔怕短期買貨後牛皮，甚至回落的話，我覺得可以逢低吸納H股，不用那麼麻煩，要用滬港通買A股啦。記住，我這個是中長線的建議，這是一個笨伯的做法，短期回報就未必好好啦。
陸羽仁
** 博客文章文責自負,不代表本公司立場 **
上星期有頭條網的網友myself問咗我一條問題：「陸SIR，小弟想請教，如要現價夾硬買兩隻股票，買完扑暈自己10年，要求有一半機會以上，平均一年股價連股息有10%回報，仲要最多買貴左，唔會買錯左個種，可以推薦兩隻股票嗎？謝謝。」
我就答咗佢一個好長的答案，附在這篇文章後，有興趣你們可以自己睇。不過，他的提問同我的答案，包含了一啲投資理念，我想在這裹講講。
佢的問題其中一個焦點，就是買一些股票，然後扑暈自己10年，希望10年後發現，每年平均有10%的複式回報。如果按數學上來計，每年有10%回報，複式增長，如果開始時候投資100元，去到10年之後就應該有260元，即係增長咗160%。
睇落去好似唔係好難，但實際不如你想像中咁易。Myself想扑暈自己，其實係針對緊散戶一個好大的弱點，散戶買股票好鐘意出出入入，考眼光，希望可以買到一啲短期內暴升的股票，買一變十。但現實上好多時散戶既搵唔到呢啲股票，亦捕捉唔到時機，如果唔係買咗一啲殺人股輸到仆，就係錯誤的時候買股，高揸低沽。
所以好多時候欲速則不達，出出入入，結果得個吉。反而有些股買咗放埋一邊，只要隻股票好的話，長揸有著數，所以扑暈自己的概念，好值買股票、特別係想買股票長的揸的朋友參考。長揸好股，減少出入，至少有一部份投資是如此。
我答Myself時候，提到有兩隻股，以前巴士的報的專欄都講過，一隻係133招商中國基金，一隻係405越秀房地產信託，點解揀呢兩隻股，原因都係因為佢哋有比較深的資產折讓，即係話你用緊1元可能買到接近2元的嘢，它們有咁深資產折讓的原因，可能是人們不太睇好整個中國市場，也有可能是不太睇好隻基金內藏的資產。總而言之，如果唔出大問題，市場感覺好番啲的時候，這些股份的股價相對資產的折讓會大量收窄，等於股價會向上。這種情況，揸上3、5年就有機會發生。
除咗呢兩隻股票之外，仲可能有好多隻股票都係有比較好的投資價，我不再一一細談。反而我想講叫大家留意一個宏觀的問題，我哋買股票，希望10年後有比較好的回報，主要考慮兩個因素，一個係果隻股票本身的因素，同埋所在地區的經濟，是否有比較長達而穩定的發展，第二個因素是我們是否在比較平的時候買入個隻股票。
若在美國、中國和香港三個地區揀，我估未來十年中國的長線的增長會比較快。中國有機會較長期保持到6﹪以上的 GDP增長，香港和美國可能只有3﹪。若講股市，內地股市市盈率12倍左右，美股16倍，所以又係中國股票較便宜，包括香港上市的 H 股，若要買扑暈自己可以長揸10年的股票，可以從這個方向揀，短期未必得，長遠應該 OK。
附陸羽仁當日對Myself提問的答案：
「Myself:咁耐無見你，答你長啲。
你的問題有三部份: 第一，投資10年，1年連股息有10%複合回報。第二，最多買貴咗，唔會買錯咗。第三，有50%機會達成此目標。
你話「只會買貴，唔會買錯」，即係要求安全，唔好買到執笠股、暴跌股(如電盈)。呢個都係幾高要求。現今世界變得太快，呢個要求唔低。買中間安龍就喊都無謂。
講啲阿媽係女人的答案。想要年回報10%，在呢個美國10年債息2.3厘的年代，係高要求。我估要高增長地區先有機會，香港就近就係中國。
一隻經常講的股票越秀房地產405，揸10年有機會。道理好簡單，佢現價3.84元，但市帳率是0.66倍，買佢等如買樓，即係100元的樓，用66元賣出來。息率7.2厘，係唔正常地高，派息比率114%，派息比收入更多，由大股東貼咗啲出來，計佢正常派5厘。派息5厘，加上每年有5%股價增長，10年複式增長，就達到你要求。
換言之，若然股價上升，市帳率由而家0.66倍，升到1.06倍，就有年均5%股價增長，即係話即使10年405的物業(主要係廣州IFC)樓價唔升，只要股價追番上資產值，都可以達到年均5%股價增長的要求。等幾年等市場對中國股票信心恢復時，有機會做到。而且我估10年廣州IFC樓價唔應該無升，而係應該升值一倍以上，換言之，揸405揸10年，有機會超標。達標機會有80%以上。
第二隻是之前講過的133，招商中國基金，派息3.6厘。即年均股價上升6.4%就可達標。即係10年後佢股價升86%。佢而家市帳率0.52倍，即100元資產用52元買到。折讓咁大除了市場氣氛唔好，亦因為佢揸重的資產主要係金融股，招商銀行、興業銀行和中誠信託加埋佔佢54%資產，特別係中誠信託有啲風險。假若呢啲銀行和信託資產無事，唔使資產升值，只要佢股價升番到市帳率1倍，股價都升92%，可以超標。若然無事，10年佢資產應唔止升1倍，可以係升2、3倍，若有1倍市帳率，等如股價升4至6倍。但亦要明白此基金風險比405高。
第三隻是指數基金，若嫌恒生H股基金2828太偏重銀行股，A50基金2823也是基礎太窄，可選滬深300指數基金，如標智滬深300基金2827。但2828好處是H股，有2.4厘息(正因內藏銀行股多息率較高)。
綜合而言，一個組合50%買405，25%買133，25%買2828或2827。目標是年均10%回報，風險是買重中國。但美股咁貴，真係買唔落手，唯有博中國啦，我估中國都有70至80%機會得。」
