今日同一班商界朋友食飯，講起西區豪宅寶翠園車位叫價350萬一個，業主忍痛想買，因為唔買就要用1萬蚊去租。我的問題是：點解唔租?
寶翠園車位屢創新高，今年6月創出290萬元成交紀錄後，現時只有叫價350萬的二手車位放售。車位天價皆因供應極為不足，車位租金也愈叫愈高，之前係6000、7000元，而家叫到1萬1個月。
我話1萬元一個月租，3.4厘租金收益，交埋稅實收2.9厘，一個車位等如一個新界單位，貴咗啲喎。
席間有個公司CEO話，陸兄，條數唔係咁計，車位價值通常係樓價十分一，寶翠園好多大單位都要3000幾萬，300幾萬個車位有乜出奇? 而且車位供應有限，你唔買，要用，往後業主又加租，點算?
我抱住包拗頸精神問佢，用350萬個寶翠園車位，同用350萬買建行(939)股票，邊樣抵啲? CEO話蘋果同橙無得比。
我話都係投資產品啫，建行5.5倍市盈率，6.2厘息率，呢啲仲係去年盈利同派息，中期盈利仲要升9%。即使按6.2厘息率計，買350萬股票，一年收息21.7萬，每月等如18083元，扣咗1萬銀租車位，仲有8000蚊落袋，業主加多啲租都頂得順喎。
當然，內銀股有風險，唔係都唔會咁平，近的有互聯網金融的挑戰，有阿爺想開放利率的風險，有中國經濟放慢風險，有樓市爆煲風險，總之風險多多。但問題如果中國經濟出大事，香港一樣會爆鑊，香港樓市一樣會爆煲喎，車位一樣要跌。
如果唔睇咁耐，睇半年，我就睇好內銀啲，寶翠園車位已經咁貴，好難再大升，而且買咗又唔係炒，升咗都無用。但阿爺經濟唔係幾掂，而家無乜計，似乎都要放水去救，做番美國、日本同一件事，短線對股票有利。
最近紅色股回咗啲，我覺得見佢跌可以買番少少，當係炒作，總比買樓買車位好啦。
陸羽仁
** 博客文章文責自負,不代表本公司立場 **
過去一兩個月我都有叫大家買紅色股，都有講過H股指數市盈率只有7倍，應有價值，可以買吓，但都估唔到大陸A股升得咁顛，帶動香港紅色股都急上，令一眾買唔夠貨的朋友都哎哎聲，有個好朋友仲話食唔到呢個升浪，退唔到休啦。
退休呢家嘢，真係可以講講。我識好多人做金融界，真係30歲已講退休，其中一個到40歲真係有機會，公司有隻超級肥雞餐，賠成年幾人工，佢即刻走，如今退休三年，日日話悶。我話你做金融界，炒股咁熟，日日去炒吓股過日神都得，佢話唔番工在家炒股，讀中學個仔四點幾放學，回家見到爸爸覺得督眼督鼻，竟然問阿爸下午可否出去行開吓，到食晚飯先回家。朋友話:「天啊，以為退休可以日日享受天倫樂，點知阿仔已經唔需要我。」
所以呢位朋友而家唯有扮返工，去相熟經紀行搵個位坐吓，收市仲要食埋下午茶，行到6點幾才回家。呢個故事教訓大家，有些事情無就好恨，有亦未必咁好。
講番退休，去番那個「好朋友」想炒股退休的那一個位。佢話食好少使好少，有1000萬現金可以退休，而家只差幾百萬。我話易過食菜，當你有600萬，搵隻股有5厘息收，複式增長，咁10年就有980萬，即係10年多一點，都可以達標。咁買那隻唔識郁的越秀房產基金(405)，佢而家派7厘息，當佢派少啲派5厘，10年達標啦。
聽完我講好朋友塊面拉長晒，好似話我日日講405唔怕悶。我話呢啲叫做base case，一個基本盤，最簡單，唔用腦，都有這種效果。但你想用腦，想快啲，當然有另外一些選擇。
我呢個好朋友跟個市跟唔貼，唔想介紹啲太貼市上落太快的紅色股俾佢，怕呢個升浪升得急亦回得快，回頭去佢無睇唔識走。就話簡單啲，買405個阿媽123啦，即係越秀地產，405係一個房託基金，即係等如買一舊物業，但123係一間地產發展商，有較大槓桿，上落快過405。
越秀地產現價1.55元，市盈率4.1倍，息率5.1厘，股價唔貴。今年10月份合同銷售額按年增34%至8.6億元人民幣；合同銷售面積約8.19萬平方米，按年增25%。累計首10個月，合同銷售金額約133.6億元，合同銷售面積約102.2萬平方米，按年分別增15%和6%，分別佔調高後的全年合同銷售目標人民幣145億元和119萬平方米約92%和86%。全年賣樓有望達標，亦比去年略高。
廣州樓市呆呆地，但越秀今年賣樓好過去年，加上早前以1.25元供了股集了資，手頭資金較多，不怕爆煲。唯一有少少風險是廣東省、廣州市打貪未完，唔知會唔會波及公司，但佢係國企，即使老總出事，間公司亦唔會散。所以有多餘錢可以買吓呢隻股，買完唔包保唔跌，但跌又唔使驚，照計坐一年應該有一定回報，唔得亦可以守吓。
