有朋友係退休一族，過去一直鐘意買煤氣(0003)和恒生（0011），貪佢地派高息或送紅股，但今年呢兩隻股都唔得，反而他有買另一隻我早期推介的招商銀行(3968)就唔錯。
我一直話買股最簡單睇盈利增長、睇市盈率、睇息率，三者皆好的可以買，但如果業績唔得，市盈率高，只靠派息或送紅股，難以持續。
煤氣一年圖。
煤氣周四收15.1元，市盈率27.6倍，超高(市盈率即股價相對於盈利的倍數，數字愈高等如股價愈貴)，息率只有2.1厘，亦唔高，只靠十送一紅股做掩眼法，我一直講，對27.6倍咁高市盈率的股份無興趣。
睇業績煤氣亦唔得，今年上半年純利為38.9億元，按年急跌18.8%；扣除國際金融中心的物業重估影響，稅後溢利為37.52億元，按年下跌5.3%；每股基本盈利為23仙，派中期息12仙，維持去年水平。期內香港煤氣銷量按年跌2.4%，至157.76億兆焦耳，即係話核心生意麻麻地。簡單總結，盈利下跌的股份，市盈率高達27.6倍，點維持呢?
恒生一年圖。
恒生周四收162.2元，現價市盈率13倍，息率4.8厘，市盈率一般，派息比較高。
睇恒生中期業績，截至6月底止中期純利增加 8%至136.6 億元，除稅前溢利增加7%至158.94億元。每股盈利增加 5%至6.98元 。第二次中期股息為每股1.4元，2019年上半年每股派息共為2.8元，按年增加7.7%。
本來恒生中期業績尚可，仲加派息。問題係佢市場集中在香港，香港下半年因為示威經濟大倒退，第三季香港GDP跌2.9%，企業有倒閉潮，銀行唔止生意差，仲會增加撥備，咁恒生下半業績大家都唔敢睇好，齊齊估會差過上半年，所以股價自然唔得。
招行一年圖。
招商銀行周四收40.4元，現價市盈率11.4倍，息率2.6厘，講市盈率在內銀股中算貴，例如建行(0939)周四收6.63元，市盈率5.9倍，息率5.2厘。一個題外話，建行首三季多賺5%，單計第三季更多賺6.1%，派息咁高，若貪派息可買建行而不是買恒生，因為以市盈率比較，建行股價只係恒生的0.45倍。
講番招行，買佢主要睇增長，佢係商業銀行，作風比四大國有銀行進取，招行有公布季度業績，今年首三季營業總收入為2,066億元人民幣，按年增長10.4%；純利為772.4億元，按年上升14.6%。每股收益3.05元。若單計第三季，純利為266.3億元，按年增長17.7%，純利增長在加快中。
今年首三季，招行實現淨利息收入1,312.24億元，按年增長11.2%，在營業淨收入中佔比63.2%。淨利差則為2.54厘，淨利息收益率2.65%，按年分別上升13和11個基點。
招行首三季純利升14.6%，遠高於恒生上半純利增5%，估計恒生下半年唔得，雙方差距更大，即使恒生夾硬派高息，但賺錢能力高下立判，睇長的要買招行，即使貪派息都係買建行抵啲。不過順帶講一句，建行每年都係炒吓上落，現價6.7元，去年近一年高位7.2元，又差不多行人止步。反而現價40.4元的招行，有機會突破全年高位42.75元。
陸羽仁
** 博客文章文責自負,不代表本公司立場 **
