橫行

早前我叫大家留意一下中海外（688）及萬科（2202）， 當時話兩隻股票正沿著上升軌上升，可以低位買，在高位沽， 買貨後等待兩、三個月，會有一定成果。

講完後大約一個月，兩股表現尚可。回落的時候， 基本上能夠守住上升軌，但向上卻突破不了高位。以萬科為例， 幾浪上升，都是大約去到18.2至18.4元水平，便後勁不繼， 近期更出現跌穿上升軌的狀況。中海外的情況也差不多， 不過情勢較萬科略好些，原因是中海外此前的升幅，沒有萬科厲害， 因此回落也沒有那樣厲害。兩股守了很久的上升軌，基本上於3月初 都跌穿了。

我此前也提過，買股要不停地檢討狀況。如果股票處於上升軌道內， 有一種部署；如果轉勢，便要另作部署，要分辨是那種形態， 股票跌穿上升軌之後，可能是橫行，也可是向下。 我暫時估計兩股都是橫行居多。

萬科跌破上升型態

估計萬科轉橫行型態

為什麼兩股會跌穿上升軌？之前的利好消息主要是中央放水： 減息及降銀行存款準備金率，結果好消息實現， 未來減息和降準還會再來。但國企股無力再上， 內地上證綜指也不能沖高，主要有兩個新因素，第一， 美元大幅走強，令資金流出中國、香港， 昨日港元匯價最弱見每美元兌7.7745，見三年新低， 資金外流令市底較弱。

中國海外跌破上升型態

估計中國海外進入橫行型態

第二， 市場本來期望中央在人大會議期間會推出比較重磅的經濟改革政策。 但除了一如市場預期的中央調低經濟增長至7%以外， 便再沒有其他重磅政策出台，內地股市也軟軟地。不過， 睇上證綜指表現，其實表現唔差跌，高位3400點，低位3050 點，現在於3349點近高位，只是港股回吐較多。

國指進入橫行狀態

睇恆生H股指數基金（2828）的走勢圖就知， 由上升變成一個橫行形態，估計仍會再試低一點的位置，例如113 元附近水平，但走勢仍是不算太差。由此推論， 中海外及萬科也是上升變成橫行的形態。不過， 要小心兩隻股票都可能還未跌完，要再試低位。中海外可能會下試2 1.1元低位， 而萬科則下試15.6元，甚至15元水平。

因此，大家要知所部署。如果手上持了重貨，想控制風險的話， 可以止蝕減持部份股票；手上持貨不多的話，我覺得不用過份擔心， 因為這兩隻股都比較大，波幅相對地有限。目前資金外流股價回落， 當資金回流時股市又會反彈，我估萬科下一波回升至17元至18元 水平，應該不是大問題。相反地，如果你手上沒有貨， 現時反而是一個吸納的時機，因為港元弱到咁，大市接近見底。

買股不能一成不變，大家要不斷留意股市走勢， 以及判斷一下目前形勢，買股始終不是一成不變的，國內的政策、 經濟數據、放水的措施，種種都會影響股市的走勢。總的而言， 大市目前是比較弱，但也不是一個太壞的情況。在橫行市中， 股票走上落，睇住上落波幅做人啦。

陸羽仁

** 博客文章文責自負,不代表本公司立場 **

最近個市弱弱地，開始有股民哭股喪，怨這怨那的， 其中一個怨言是早前減息時，升得唔夠多，沽唔到貨。

老友富貴師奶係一個典型，佢買股有少少分唔到長揸定短炒， 時長時短，有啲飄。佢早前在上證綜指3100幾點左右揸咗批國企 ，建行(939)、萬科(2202)都有，一聽到減息想沽， 就早一晚做功課， 睇住自己入貨價，計吓建行要食5%，萬科要食10%，定好個價， 第二朝一早入埋盤，等食糊。

怎料那朝沽貨人多(其實都估到)，個市一開已經唔係升咁多， 跟住開咗無幾耐就回，富貴師奶完全沽唔到貨，佢就媽媽聲， 話個市咁屎，升得咁少，搞到佢沽唔到貨。

好似隻2202萬科，佢17元入貨，當日想18.7元沽， 一開市高位只係18.26元，跟住好快回番到18元以上， 當日較長時間在17.8元左右上落，比上日無乜升跌。 後來跟個市一路回，到兩日後本周三已收16.64元，比她入貨價 17元低。她其餘的貨色如建行也一樣，當日一隻都無沽到。

我又唔係好為富貴師奶擔心，佢係有米之人， 過去短炒呢啲大股都係時得時唔得，去年年尾最威走咗幾轉， 但唔得時佢就坐吓，通常都俾佢坐番轉頭。

富貴師奶問我點解減息本來應該升多啲，但係結果升咁少， 搞到佢出唔到貨? 我話先唔好講原因，佢話「應該」呢個講法本身就係錯，股市無「 應該」，見到幾多就幾多，好多人心雄想買時，可能升得比你以為「 應該」的更多，去年底今年初就是如此。好多人審慎時， 就會升得比「應該」的少，而家就係咁。

我話短炒想沽貨唔理你估「應該」係點，要睇實際係點， 好似本周一減息之後早上開市前，股票在開市前有議價時段， 已經知道議乜價，我就有另外一啲朋友當年早上出晒貨， 佢睇住議價個價，仲放低兩格，一開市就沽晒啲紅色股。好似隻2202咁，當天早上議價議18.24元，如果你開市前落盤18. 22甚至18.2元沽，一開市可以沽清。以富貴師奶入貨價，沽到 18.2元，都賺7%，佢揸兩三個星期賺7%，其實都好多， 但佢堅持想賺10%，但隻股當日根本無見過18.7元呢啲高價， 點會沽到呢?

短炒和長揸不同，長揸可以有自己一套，有自己價位的看法。 短炒要順市道，市場俾你乜價就係乜價，成交為王，講乜都無用， 也沒有應該這回事。富貴師奶炒大股無問題，唔得就坐吓， 但如果佢係炒窩輪、炒期權、炒期指，成日話「應該」， 唔到價唔沽，結果就好易輸清啦。