大陸個市一如所料升得太癲急插，跌得幾跌股民已經叫救命，網傳有大陸股民買咗其中一隻300幾倍PE的神股大智慧，話跌多一日佢就要跳樓，點知佢講完隻股第二日真係跌多9%，希望呢個股民吉人天相。
股市喪升時，我會保守啲，股市喪跌時，我會進取啲，有啲網友都睇通我條路，例如網友小貓愛情觀早兩日就有這樣的留言:「係呀~聽陸SIR話,一定唔會輸大錢,但建議價50%都入唔到，要進取D,就要任性少少，但大方向强烈建議一定要聽。
就算唔跟都要睇下。香港的股市分析師，我係最重視陸SIR同郭獅子的,因為佢地兩個都係唔會隨便更改對後市方向睇法的。留意左佢地好耐,好多時睇得保守左,會捱個幾兩個星期同個市方向唔同，但最後會證明好多時都係正確的。個D上午升就話好消息，下午跌就轉講壞消息的分析師，小貓真係信泛民都好過信佢地。」
炒股睇股市大勢好重要，要研判大方向係牛定熊，若然係牛，要睇而家會唔會升得太急要調整，就係比較重要的方向。但即使方向正確，但具體點數去到邊度，邊一日見頂見底，就好難講得準啦，我話我睇到你都唔好信我。
過去兩個星期，你地都會覺得我比較審慎，唔係幾想講買乜，講吓冧巴都講得入貨價較低，或者一講完唔對路就叫大家走，皆因感受到內地個市升得太急，始終有日要顯著回吐，唔想大家高追中伏。
就如剛過去的星期日，有老友問我內房股富力，我都叫佢等等。星期一又有另一個老友話沽咗貨好唔唔好追番，我見市高唔想答佢，佢仲話我「未答我問題…係忘記了」。其實當時個市咁高，有乜好建議呢? 但建議你唔買，隔一日個市又升，你又會唔會覺得我傻呢?
講番現況，個市回調不少，特別是熱門股都有較深跌幅，若然高位沽咗貨，手上貨好少者，可以開始慢慢吸，我強調「慢慢」兩個字，因為怕有人一睇到個「吸」字，就一注瞓身，但買完有啲波動股再跌多10%唔奇，所以不宜太快太勇，最好分注。
大市調整的時間，同上升一樣，會比大家想像長一點，佢連跌幾日跌下來，可能有一個反彈，然後又再插，再插時穿唔穿底才見真章，所以唔好一注入晒，留少少力好啲。
陸羽仁
** 博客文章文責自負,不代表本公司立場 **
美股在歷史高位附近徘徊，已經有一段日子，衝唔穿，亦唔回調（ 所謂回調，一般指係吐套10%以上），市況都幾沉悶。同2013 年的大升三成比較，固然差天共地，與去年比，亦呆滯好多，去年標普500指數全年升13.6%。不過你如果以為大市升得咁勁，股民必定賺到錢，就錯啦。 據投資公司SigFig分析了超過25萬個的投資者的投資組合，投資者的平均回報，只係上升咗4.2%，當中有三份之一的投資者回報食蛋，甚至蝕錢。
點解會係咁呢？當然係喺投資的時候犯錯啦，有專家指出，投資者犯嘅最大錯誤係嘗試擊敗大市， 更重要的係佢哋以為自己有咁的能力。Texas Tech University教授伊雲斯基(Harold Evensky)解釋，這正如所有父母、祖父母都認為兒女或孫兒女都比別人的優秀一樣，呢個係人類的通病，不喜歡被視為平庸。
但當投資者太過心雄想擊敗大市時，往往就會跌入一個以至多個的投資陷阱，傷害到回報。第一個陷阱係將資金太集中於某隻股票，據SigFig分析師指出 ，有60%投資者將超過10%的資金投放到一隻股票上；另外有1 5%的人將超過一半的資金投放在兩隻股票上。當該公司出現問題的時候，便損失慘重，當年的安龍（Enron） 就係一個慘痛教訓。分散5、6隻股票較佳，或者買重指數基金，因為指數基金本來已包含大量不同股票，有分散投資的作用。
第二個陷阱係太過「地方主義」，將投資集中在本土。分析指出，有 60%投資者嘅投資組合之中，外國的股票不足10%。反映投資者出於本土主義，將投資太集中於本國，或者自己熟悉的地方。當本國經濟麻麻時，這些純本土的投資組合就唔掂。套用到香港的情況， 如今本土零售經濟麻麻，買本地股亦會差啲。
第三個陷阱是投資者購買基金時，往往希望買一個「好故事」， 買一些已經很流行，價格已經升得很高的基金。而一般流行嘅基金，手續費亦高很多。而多個研究已經證實，即使在熊市中，買較昂貴、 更多人買嘅基金，唔一定跑贏較為平價、唔係好熱的基金。 點解要多俾一點佣金呢？
最後一個陷阱，亦係最普遍嘅錯誤係交易太頻繁。同誤判市場的狀態。頻繁交易係導致回報減少嘅最大元兇。據Sig Fig的資料顯示，5個投資者之中有一個在期內將手上的股票全部 轉手。凡係咁做的話，只係扣除交易費用，回報都會少咗0.5%， 一年少0.5%，咪以為好少，一萬元投資，每年6%回報，30年 累積就有81.6萬元，回報由6%，減至5.5%， 總收益將會減少7萬元。記住投資和投機的分別，投資要長揸。
在這種牛市中，「投機的我」會好高興，但不要忘記搞好「 投資的我」的倉位，上述分析對「投資的我」的組合是至理明言， 假設你把五成資金放入一個投資倉，這個倉位要長贏， 唔使期望成投資成績跑贏大市，指望成績中中等等就OK，做一個多樣化、平衡而合理的組合，能夠與大市同步，已經好理想啦！
陸羽仁
後記:南車（1766）昨日見好消息不升，近日已見動能轉弱， 恐怕炒作資金已經流失。之前建議分三注入，現在建議停止入第二、 三注，已經入的第一注可定穿低位的14.6元止蝕， 若反彈上購入價沽出。
