EQ Test

星期四股市從低位回升，相信好多股民都透咗一啖大氣， 鬱悶的心情終於放開，希望阿爺最後能救到個市， 將佢哋能解脫出來。

 

星期四有朋友同我講起，星期三個市跌2000點時無買股， 有啲笨，睇唔到星期四的大幅反彈。我就講咗兩個睇法， 第一星期三的確有短期見底的感覺，第二無買股唔一定係笨。

點解話星期三有短期見底的感覺呢？因為個市不斷地跌， 好似壓力煲，星期三已壓到好多朋友人都癲， 幾個曾經問過我股票的朋友，都WhatsApp來同我講， 話好驚，好擔心，有個仲話再跌落去我死都唔掂啦！

雖然我明知佢咁講，係一種誇張法，見到咁多朋友有咩樣的表述， 都知道個市咁樣跌法，壓力太多，壓到好多人爆炸要斬倉啦。 呢啲固然可能係短期見底的一個徵兆， 因為逼到好多要沽想沽的人都頂唔順沽咗。

當然後市反彈之後，係咪再跌，仲要睇阿爺救市的成效， 但至少好似通過一浪洪鋒咁，至少呢一浪過咗去啦。

第二個問題係無買，點解唔覺得遺憾。我就咁講， 呢啲市我唔會叫人去買， 因為買唔買主要睇每個人的生理和心理承受力。 首先要你本來手上貨多唔多，如果手上貨已經好多，係唔應該再買， 市勢不明，究竟阿爺係咪好似星期四咁最後出暴力招， 或者係無招出，在星期三的時候係無人會知道的。 另外外電報道索羅斯來咗香港，企咗個索羅斯喺門口， 隨時覺得香港唔掂就郁你，呢個係真實風險。貨多者， 生理承受力低也。

呢啲市都係高度風險，如果你手上已經貨很多， 挨過咗低潮升番上去，淨係你自己的組合都會有好多升值， 唔需要買多啲股票，星期三只係適宜手上好少貨， 錢好多的人走去買，買完再跌多50%都唔驚的人，就可以買嚟博反彈。呢種人生理承受力較高。

另外要講講心理承受力。我覺得呢次跌市就等於一個EQ Test，如果你渣住股票好騰雞的話，咁心理承受力就低。在未來股市有幸回升時，就應該減啲倉，唔好持貨咁多，因為人人承受的壓力的水平唔同，的而且確要憑自己的壓力指標去行事。呢啲大跌市，唔止考IQ去決定如何買賣，更睇EQ睇吓持股的心理素質。

若然心理素質低，就要睇睇自己個倉，如果你個倉位中有好多雞股跌得好勁，亦都應該檢討吓自己的策略，係咪應該買多啲大股，買少啲雞股，因為大股點跌法都仲有個譜，雞股跌落去可以跌到無影。

最後想講唔好抱怨自己星期三無買股，應該慶幸個市可以反彈回升， 無論後市係點，都俾咗一個喘息機會大家， 重新檢討自己未來的投資策略。

陸羽仁

** 博客文章文責自負,不代表本公司立場 **

有人問我估唔估內地的跌市，我話估到，因為內地升得咁多， 始終要有個合理的調整。但我估唔到係內地跌的深度和扭力，跌穿4 000點唔奇，彈極都彈唔番上去，就估唔到啦。

表面睇阿爺接連出招都頂唔住。人行上周末出招減息兼降準， 兩招齊出都算大力，本周二上證綜指終於彈224點， 但到周三香港放假內地又插223點，剩番1點升幅俾你。前晚阿爺 又出三招，孖展都不用逼人平倉，但內地股市都照隊， 阿爺的護國軍在2點半後大力狂掃兩桶油等巨股護盤，一隻市值2. 1萬億的中石油A股可逆市大升8.8%， 內地大市最後都跌140點，你話內地個市呢場惡鬥， 都唔似自然發生啦。

而家中證監話明有人「惡意做空活動」，跨市場操控， 要拉去公安查辦。 初步聞說阿爺懷疑有人大沽期指大力隊指數基金中證500造空。 如今調查方向都提升到是否針對現在領導層的高度， 懷疑有人隊冧個股市，阻斷內地金融改革， 斷絕支持經濟的股市水源。唔係沽吓期指搵吓食咁簡單。

有個老友聽聞有此可能，有啲驚，問我好唔好沽貨走人。我這樣答：第一內地個市跌得不尋常，正常內地出招減息降準已可止血， 如今連中證監話孖展唔使補倉都未止到血，的確有風險， 如你的倉位曝露在過大風險中，例如借孖展炒股， 減倉避險都不能避免。

第二是事件後果難料。如果不止是財經角力，而是政治鬥爭， 就超出咗一般財經分析的範圍，若只講財經我覺得無問題， 唔掂阿爺出招再放水，停IPO，減印花稅，仲有好多方法。 但講到政治鬥爭，就要講力，比較難估。

昨日人民銀行黨組中心開完一個學習研討會，人行行長周小川有講話，外界集中報道佢話「 牢牢守住不發生系統性區域性金融風險的底線」。 我就留意到另外幾句，「 人民銀行廣大黨員領導幹部要認真學習貫徹習近平總書記系列重要講話精神，把“三嚴三實”貫穿于金融改革全過程， 引導全系統幹部職工以嚴的精神、實的作風， 全力做好中央銀行工作。」周小川話要貫徹習大大精神， 係一種政治表態。

第三講信心也要控險。若然真是內地有勢力惡意沽空， 最可能係舊勢力針對習大大全力打貪，大搞改革， 影響到他們利益的行為。我們要預測， 以習大大為首的新領導層有無能力打得贏啦，呢啲分析好個人化。 我有信心佢打贏，亦覺得自己持倉風險有限，所以繼續持有， 但預咗呢一兩個星期就係決戰，內地個市和紅色股都會好波動啦。

但如果你信心有限，或者暴露出來的倉位太大，槓桿太高， 就要控制風險，若然是政治市，也是最難估的市。