壓倉石

上周股市驚嚇一跌，相信都嚇唔少人。 上周三我收到不少叫救命的電郵、私訊或短訊，都是見跌市驚得滯， 問我解套之法，我當時無嘢好建議，都係建議大家唔好驚， 唔好亂沽，捱吓。呢啲風浪捱不住，其實並不適合玩股票。

但我在問題中發現，散戶死揸一些我曾經建議過的股票， 其中最典型的是中車(1766)。我有點驚奇地問， 我後來不是專門寫了文話中車因為炒作資金撤退， 叫買了第一注的朋友不止不要再買第二、三注，仲要等反彈走人嗎? 那些散戶有人話「想揸多一會睇多一陣」，有人話「返緊工沽唔到」 ，有人話「自己當時仍然睇好」，總之係有聽我話買，無聽我話沽。

我想再提提大家，買股要控制風險，若然我話係「炒炒」，當然係「 投機的我」，投機一係限注碼，好細注輸晒唔緊要，一係定止蝕，輸 10%就斬倉，不要死揸，更不能在遇上出乎意外大跌時不斷加注。 萬一最後碰到一去無回頭的崩潰市，這種唔止蝕兼加大的手法， 可以輸死人。

在升市的時候，有人話我講來講去都幾個大股冧巴， 嫌這些大冧巴升得少，因為在那些時節，求其一個冧巴一日都可以升 20、30%，那些大冧巴買咗唔升或者無大升，真係睇見就眼寃， 後來我都講吓一些中型冧巴，如中航科工(2357)， 但就從來無講細冧巴。因為買咗中型冧巴，萬上遇上大冧市， 走唔到，死捱三、五年都可以翻身。但買咗細冧巴， 大崩潰無人再炒，細冧巴可以跌到近零，因為佢地會供股合併收貨， 總之令你10萬元可輸剩10元，所以我就唔講細冧巴啦， 怕好似中車咁，提過一次，你地買咗唔識走。

經過呢次跌市，請大家分清乜嘢係投資，乜嘢係投機， 對投資唔好要求回報太高，對投機要識避險。

若講「投資的我」去買股，風險較低係越秀房託(405)呢類股份 ，但升市時佢真係唔會升。佢在4月中高位最高都係去到4.57元 ，比去年10月中國減息前的浮沉水平3.84元，即係最多只係升 19%。5月比較多時間在4.35至4.38元之間窄幅走動， 然後在7月8日大跌日低位3.9元，即是你在4.35元買咗， 插到驚心的日子只係跌10%，波幅不太大，想執平貨都無。 如果上星期三晚瞓唔著的朋友，揸咗405應該瞓得著。

405的風險是中國經濟爆煲，廣州甲級寫字樓好差， 樓價和租金都大跌，出現呢個情況機會唔太大。 第二個風險係利息急升，不利房託股， 但佢從來都不似領匯咁跟足利息逆向走，所以風險有限。

呢啲股問題是市好時不識升，所以我形容為「壓倉石」， 用來壓住個倉，形成一個低風險部份，例如你用兩三成買佢， 即使大冧市，佢股價都跌埋落去，你唔理長揸都無壞。405現價派 息7.1厘，我估10年後廣州甲級寫字樓樓價和租金比現在貴一倍 ，佢股價10年可以增長一倍，咁換算成每年複式回報有7.2厘， 加埋派息即係一年有14.3厘年增長，咁計都唔失禮。我估有七、 八成機會做到。

倉位除了壓倉股之外，其餘部份要炒作，即使炒中型股好似中航科工 2357呢類，也要明白波幅會好大。若在它剛起步大跌時買，當時 7個幾，而家仲未見家鄉，大跌中低位見3.9元，十分得人驚(應 該好多斬倉套現盤)，之後跟大市大反彈，周一反彈高位7.27元 ，今日收6.65元。軍工股長線唔太擔心，可以看好， 但近期走勢仍反覆，跌近6元可以分注開始吸納。但急彈上7個幾有 錢賺者又唔怕減持。未來大市仍有震蕩反覆也。

結論是要分布好自己倉位不同性質股份，按自己性向，調控較保險壓倉股的比。膽少，咪買多啲壓倉股囉。

陸羽仁

** 博客文章文責自負,不代表本公司立場 **

星期四股市從低位回升，相信好多股民都透咗一啖大氣， 鬱悶的心情終於放開，希望阿爺最後能救到個市， 將佢哋能解脫出來。

 

星期四有朋友同我講起，星期三個市跌2000點時無買股， 有啲笨，睇唔到星期四的大幅反彈。我就講咗兩個睇法， 第一星期三的確有短期見底的感覺，第二無買股唔一定係笨。

點解話星期三有短期見底的感覺呢？因為個市不斷地跌， 好似壓力煲，星期三已壓到好多朋友人都癲， 幾個曾經問過我股票的朋友，都WhatsApp來同我講， 話好驚，好擔心，有個仲話再跌落去我死都唔掂啦！

雖然我明知佢咁講，係一種誇張法，見到咁多朋友有咩樣的表述， 都知道個市咁樣跌法，壓力太多，壓到好多人爆炸要斬倉啦。 呢啲固然可能係短期見底的一個徵兆， 因為逼到好多要沽想沽的人都頂唔順沽咗。

當然後市反彈之後，係咪再跌，仲要睇阿爺救市的成效， 但至少好似通過一浪洪鋒咁，至少呢一浪過咗去啦。

第二個問題係無買，點解唔覺得遺憾。我就咁講， 呢啲市我唔會叫人去買， 因為買唔買主要睇每個人的生理和心理承受力。 首先要你本來手上貨多唔多，如果手上貨已經好多，係唔應該再買， 市勢不明，究竟阿爺係咪好似星期四咁最後出暴力招， 或者係無招出，在星期三的時候係無人會知道的。 另外外電報道索羅斯來咗香港，企咗個索羅斯喺門口， 隨時覺得香港唔掂就郁你，呢個係真實風險。貨多者， 生理承受力低也。

呢啲市都係高度風險，如果你手上已經貨很多， 挨過咗低潮升番上去，淨係你自己的組合都會有好多升值， 唔需要買多啲股票，星期三只係適宜手上好少貨， 錢好多的人走去買，買完再跌多50%都唔驚的人，就可以買嚟博反彈。呢種人生理承受力較高。

另外要講講心理承受力。我覺得呢次跌市就等於一個EQ Test，如果你渣住股票好騰雞的話，咁心理承受力就低。在未來股市有幸回升時，就應該減啲倉，唔好持貨咁多，因為人人承受的壓力的水平唔同，的而且確要憑自己的壓力指標去行事。呢啲大跌市，唔止考IQ去決定如何買賣，更睇EQ睇吓持股的心理素質。

若然心理素質低，就要睇睇自己個倉，如果你個倉位中有好多雞股跌得好勁，亦都應該檢討吓自己的策略，係咪應該買多啲大股，買少啲雞股，因為大股點跌法都仲有個譜，雞股跌落去可以跌到無影。

最後想講唔好抱怨自己星期三無買股，應該慶幸個市可以反彈回升， 無論後市係點，都俾咗一個喘息機會大家， 重新檢討自己未來的投資策略。