「騰雞王」炒新股損手

呢排大市唔熱新股熱，散戶唔買大股，炒吓新股，照計都搵到三茶兩飯，但唔啱遇到一個我叫做「騰雞王」的老友，炒新股竟然要輸錢。

 

騰雞王係打工皇帝，收入甚豐，但炒股向來唔博，屬穩陣派，但見自己銀行戶口存的現金數其可恥的0點幾厘息，把心一橫，就走去「打新」(抽新股)。去年第一次出擊抽熱門遊戲股雲遊(484)，用100萬元去抽，分到兩手股票，執咗幾千，雖然贏唔多，但都攞個頭彩。

 

騰雞王食過番尋味，跟住又去認隻原生態牧業(1431)，嘩呢隻嘢就嚟料啦，佢揀中原生態係因為有份財經報紙推介，話呢隻係熱股，佢就入飛去抽，點知到截飛那一天，那份財經報紙先至話隻認唔得喎，認購反應唔好喎，騰雞王媽媽聲，「喂，咁就唔好一早話佢熱呀，到最後一日先至話唔得，入晒飛先至嚟講，都無得救啦。」

 

衰開好以套餐咁嚟，隻原生態認購唔好，分派就多，騰雞王同樣用100萬去認購，派咗值10幾萬元的股票，認到的貨比想中多，隻股11月26日首日上市，馬上就跌穿2.7元的招股價，收2.6%，已較招股價低4%。隨後再插，騰雞王見跌到2.5元，輸咗7%就投降。佢如果唔走，而定隻股得番2.23元，仲傷。

 

騰雞王買隻原生態輸咗萬幾蚊，變成炒新股「贏幾千，輸萬幾」，雖然對佢嚟講一啲都唔入肉，但係在新股熱潮中炒新股亦要輸錢，相當無癮。

 

佢問我點睇，我話以前新股話好嘢一定係好嘢，而定話係好嘢都要睇清楚，否則好易中招。唔係財經報紙有心靠害，而係佢哋的記者可能無經驗，聽新股包銷團的銀行家講話隻股熱佢哋就信，寫埋出來，無搵過可能買貨的芬佬求證，變咗幫人吹水，信佢就中招。

 

新股真係唔熱唔好買，而且要等到最後一刻才好入飛呀。

 

陸羽仁已開設Facebook專頁，快啲去Like：

https://www.facebook.com/pages/%E9%99%B8%E7%BE%BD%E4%BB%81/204865603047048?hc_location=timeline

陸羽仁

** 博客文章文責自負,不代表本公司立場 **

今天想講一個笑話和一個騙局。

個個股民都想找必贏的投資。每次朋友問起有沒有必贏股票可以推介，我都費盡唇舌去講沒有這回事，但他們的神色告訴我:「你屎啫，你唔知咋啩!」

 

去年底和一班美女師奶在太古城香港東隅酒店Feast餐廳吃飯，她們又問我有乜必贏股推介，我開了一個玩笑，我話「你買得少我有辦法令你必贏，買得多就無辦法啦。」那班美女即時起哄，急問冧把，仲話要攞紙筆。我話我的建議大路到唔大路，你買隻恒生H股基金(2828)，唔好買得多，最多買1萬蚊，同經紀講好買入後10%止蝕，若果唔死就升15%食糊。我一人俾1000元蚊你打底，你10%止蝕最多輸1000元，我俾咗你先，你唔使輸至還番俾我。佢地聽完「唓」一聲，覺得我玩佢地。

我笑笑口話，我呢個笑話有來頭，係來自一個騙局。話說有一個股壇莊家，有一日同三個富貴師奶打麻雀。富貴師奶問佢有乜推介，佢話有隻必贏股，至少升一倍，但隻股貨好疏，唔好買得多，一人唔好買多過一百萬蚊，莊家仲好豪咁話，「輸咗入我數」。

富貴師奶們聞言，大喜過望，第二日馬上落盤，當然唔止買100萬咁少，個個買1000萬、2000萬，等住升一倍發達。隻股開始時真係愈買愈升(佢地幾個爭住買都掃高十格八格啦)，但買到後來多多貨都有，買完隻股已經軟晒。仲唔止，過得一個月，隻股跌咗兩三成。佢地又同莊家開枱，個個哭喪著臉，問「你又話嗰隻股得，我買咗都唔得?」莊家好豪咁攞本支票簿出來話:「我話咗輸咗入我數，嗱當你地買咗100萬啦，我一人賠番30萬俾你。」

三個師奶聽完欲哭無淚，人地又的確話咗叫佢地唔好買多過100萬，買咁多又點怪得人? 誰不知這只是莊家佈的一個局，大力吹那隻股得，騙得師奶們貪念發作，大買特買，等佢地接貨，自己就把手上的貨大手沽給她們，高價出貨。

呢個故仔教訓我地，騙人必須先跌錢，所以散戶見到愈似必贏的投資，愈易中招呀。 

陸羽仁已開設Facebook專頁，快啲去Like：

https://www.facebook.com/pages/%E9%99%B8%E7%BE%BD%E4%BB%81/204865603047048?hc_location=timeline