濠賭股大升，銀娛（027）及嘉華（173）大老闆呂志和身家暴漲，佢接受《蘋果日報》訪問時提到，做大富未必安樂。佢話錢愈多，反而愈唔開心，成日身不由己，又話「情願好似舊時咁，得閒就湊吓啲仔女去吓旅行、游吓水，咁就最開心，又冇人睇我。你而家出到嚟，個個啄鬼住你，煩呀。」
http://goo.gl/BdPqly
小市民聽到呂志和咁講，會覺得佢口講唔開心，其實講緊風涼話，只係「晒命啫」。
不過，據陸羽仁接觸過的唔少超級富豪，又發覺佢哋的確唔係一般人所想咁開心。呂志和近年在富豪榜急促爬升，可能仲會興奮少少，其他早已排在富豪榜前列的鉅富，連這種刺激感都冇埋。
一般人想像富豪最正的生活，錦衣肉食，巨宅美人，遊艇飛機，但呢啲嘢嘆得幾嘆就麻木，正所謂娶咗香港小姐對住佢10年，佢都變番普通人。但富豪卻有好多小市民無的煩惱，唔純係「身不由己」，陸羽仁觀察佢地唔happy的原因有三大個。
首先係擔心地位受到挑戰。大家唔好以為只有普通一個二打六，至會爭上位、爭升職，擔心飯碗俾人搶走。其實超級鉅富，尤其係排在富豪榜前列的，一樣驚事業俾人過頭，排名俾人搶走，面對的壓力同普通打工仔沒有分別，都唔好講有時會如新地郭氏兄弟咁惹上官非嘞。
第二個煩惱係年華老去，時不我待。做到超級富豪，無80，也有70，人生都走咗一大段。即使叻到好似剛剛過身的邵逸夫爵士，107歲，都係只有20、30年貨仔，更何況有幾多人可以有107歲呢！
有網友問陸羽仁，佢現在31歲，打份工，一事無成，非常無癮。我嘅回答係，你而家咁後生，青春無限，已經好過癮啦！網友以為我咁講係玩佢，佢仲年輕，唔知青春的價值。恆基（012）主席李兆基去年年中講過，「用百分之九十九的身家換30年青春更加化算。」如果真係得嘅，我相信所有富豪都會即刻換。一個富豪有1000億身家，而家86歲，若得番10億身家，變番56歲，佢真係會制，得番1億都可能制，得番1000萬佢或者要諗諗(我估都會制)，由此可見年少多好。你無論有幾咁多錢，諗起人生就快玩完，又點會開心呢？後生，才是最happy嘛。
插一隻《年少無知》俾大家聽聽。http://goo.gl/cMNTX8
鉅富最後一個煩惱，係最擔心子女爭產。呂志和提到，「自己錢唔係咁多」，但亦承認「個個家庭都有呢個問題。」我就話普通家庭過年一家人坐埋食飯，嘻嘻哈哈，樂也融融。大富之家就唔同啦，人人勾心鬥角，諗緊嘅嘢好可能係「老竇幾時死？會分到幾多？」咁又點會開心呢？
陸羽仁唔係喺度安慰大家，冇錢都好掂。而係話第一，年少多好。第二係建議爭取做小富唔使做大富，目標係退休時有過千萬現金，財務自由，一家人開開心心就OK啦！
陸羽仁已開設Facebook專頁，快啲去Like：
https://www.facebook.com/pages/%E9%99%B8%E7%BE%BD%E4%BB%81/204865603047048?hc_location=timeline
陸羽仁
** 博客文章文責自負,不代表本公司立場 **
呢排大市唔熱新股熱，散戶唔買大股，炒吓新股，照計都搵到三茶兩飯，但唔啱遇到一個我叫做「騰雞王」的老友，炒新股竟然要輸錢。
騰雞王係打工皇帝，收入甚豐，但炒股向來唔博，屬穩陣派，但見自己銀行戶口存的現金數其可恥的0點幾厘息，把心一橫，就走去「打新」(抽新股)。去年第一次出擊抽熱門遊戲股雲遊(484)，用100萬元去抽，分到兩手股票，執咗幾千，雖然贏唔多，但都攞個頭彩。
騰雞王食過番尋味，跟住又去認隻原生態牧業(1431)，嘩呢隻嘢就嚟料啦，佢揀中原生態係因為有份財經報紙推介，話呢隻係熱股，佢就入飛去抽，點知到截飛那一天，那份財經報紙先至話隻認唔得喎，認購反應唔好喎，騰雞王媽媽聲，「喂，咁就唔好一早話佢熱呀，到最後一日先至話唔得，入晒飛先至嚟講，都無得救啦。」
衰開好以套餐咁嚟，隻原生態認購唔好，分派就多，騰雞王同樣用100萬去認購，派咗值10幾萬元的股票，認到的貨比想中多，隻股11月26日首日上市，馬上就跌穿2.7元的招股價，收2.6%，已較招股價低4%。隨後再插，騰雞王見跌到2.5元，輸咗7%就投降。佢如果唔走，而定隻股得番2.23元，仲傷。
騰雞王買隻原生態輸咗萬幾蚊，變成炒新股「贏幾千，輸萬幾」，雖然對佢嚟講一啲都唔入肉，但係在新股熱潮中炒新股亦要輸錢，相當無癮。
佢問我點睇，我話以前新股話好嘢一定係好嘢，而定話係好嘢都要睇清楚，否則好易中招。唔係財經報紙有心靠害，而係佢哋的記者可能無經驗，聽新股包銷團的銀行家講話隻股熱佢哋就信，寫埋出來，無搵過可能買貨的芬佬求證，變咗幫人吹水，信佢就中招。
新股真係唔熱唔好買，而且要等到最後一刻才好入飛呀。
陸羽仁已開設Facebook專頁，快啲去Like：
https://www.facebook.com/pages/%E9%99%B8%E7%BE%BD%E4%BB%81/204865603047048?hc_location=timeline
