收息與賺價

股民投資股票，每個人心態唔同，有人鍾意出出入入，有人鍾意長坐收息，唔同態度對事物的睇法都好唔同。

最近港鐵同埋政府搞出為高鐵融資的方案，建議港鐵派每股＄4.4的高息，為高鐵超支填數。立法會議員張華峰批評這是一個爛方案，指派高息背後的代價是要靠借貸來支撐，為港鐵帶來至少兩大風險，港鐵透過債務方式籌錢派特別股息，淨負債權益比率將由今年6月30日的9.1%，大幅上升至特別股息及額外借款生效後的29%。

我想講講牌高息係咪等於風險一定好高呢？我們怕公司高借貸，主要怕公司管理層借咗錢去亂搞，例如大量花費，或者胡亂高槓桿咁去投資，不過港鐵唔係呢種情況，借錢只係派息入股東個袋，從股東而言，並冇增加到風險。

股神巴菲特的巴郡公司，唔會派息，因為股神相信，錢俾番股東佢哋會胡亂消費，亦唔能夠好似巴郡咁有每年15%回報。不過香港的公司無巴郡咁神，所以香港的股東鍾意公司派高息。

你睇睇隻煤氣（003），佢最鍾意送紅股，等於變相派高息，所以佢而家深受股東喜愛，市盈率高達25倍。中電（002）同係公用股，雖然派到4.1厘息，但係冇送紅股，佢的市盈率只有14.6倍，睇佢哋的股價表現，就知道股東鍾意乜嘢。

有啲股東鍾意出出入入，唔理派息，我有一位有錢阿伯朋友，就係呢類人，所以亦都唔鍾意港鐵的融資方案，因為消息出嚟之後，港鐵股價只是微升，冇大炒，所以佢就唔喜歡。

講開又講，呢個有錢阿伯最近炒緊隻華夏滬深300基金（3188），佢睇到內地股市大約都保持一個上升軌，所以佢等呢隻基金從高位回落5%左右就買，上返7、8%就食糊，但佢經過7月的大跌市，都唔敢唔定10%的止蝕位，但至今都未只止蝕過，仲食咗一兩轉，佢話每次搵到餐茶錢咁話。

陸羽仁

** 博客文章文責自負,不代表本公司立場 **

商品大王羅傑斯早前來香港訪問，佢係中國大好友，長線睇好中國，佢帶埋兩個女移民咗去新加坡，就係想佢哋在亞洲區長大，學好中文。

他對中國的睇法可以話係超長線，因為佢係講緊個女長大即係10年20年之後嘅事，不過一個老外長線睇好中國嘅態度，大家都可以參考。

不過我今次唔係想講睇好或者睇淡中國，而係想講羅傑斯對股民嘅祝福語，有好多粉絲到場搵佢簽名，佢除咗簽自己個大名之外，仲寫咗Buy low(低買)兩個字，即係買股票要「低買」。我就羅傑斯嘅金句，送多兩個字俾大家，就係Sell high(高沽)。

低買高沽，好似講緊阿媽係女人嘅道理，你可能會話，鬼唔知買嘅時候要買得平，高嘅時候要沽得高咩。咁商品大王做乜仲叫人低買呢？其實好簡單，低買高沽仍然係投資贏錢嘅不二法門，意思係跌得多、人人都驚嘅時候，要忍得住手去買，升到咁上下，即使大家都覺得未見頂，亦都忍得住手去沽，做得到就唔係大家想像中咁容易啦。

我有好多實戰嘅例子，其中係美女朋友買貨和沽貨嘅故仔，呢個美女同我講佢識我之前，唔係咁經常買股，睇咗我啲專欄，見我推介一啲股票 ,佢睇完見隻股跌得多就買下，入咗見佢升得多嘅時候估下。

美女買或沽嘅時候，通常都會比個留言我，目的係想聽我覺得佢賣得好唔好，或者沽得好唔好，我經常都比一個正面嘅反應佢，即使我見到佢買時個價未見底，但佢開始分段買，我都話過我可以開始買下。又或者個市未見頂，佢開始沽，我都覺得係可以分段沽吓。

舉個例上周五美女留言，話「2357中航科工尾注剛＄6.8sold, 有10-11％gain」

佢沽的時候我都覺得軍工股或者仲得炒下，但我通常都係覺得沽亦無所謂，好似2357而家係6.89元，比佢故的時候高，或者將來會更高一點。佢有時會話自己黑仔，次次沽完之後都升，我就安慰佢，你之前冇買股，而家買股，即使只賺10、 15%，即使賺唔多，但點都有賺。

拉長去睇美女的投資方法，通常佢買唔買賣得最平，沽亦未係沽到最高，但一次賺10幾%，累積落嚟，就係不錯的回報。總好過高揸低沽。結論係高沽其實都係好考功夫，但只要有賺，沽完再升又何妨。