股市過了新年便大跌，國內股市三天內兩天跌停。這種跌市有中國經濟積弱的原因，有人民幣下跌的衝擊，也因為阿爺要求內地的主要股東半年內不減持股份的時限快到期，再加上新推出的下跌7%便要停市的「熔斷機制」，一大堆原因加起來，便造成近日的大跌市，搞到阿爺昨日漏夜暫停了融斷機制。
每逢大升市或者大跌市，便有朋友打電話問我點做好。我明白大跌市特別惹起股民恐慌，不妨教大家用三招應對。
第一招，投機要止蝕。我經常講，如果你買的是投機倉，例如想博隻股份過年後升一升便走人，唔該你按10%止蝕行事。股價跌低了10%，便要果斷「熔斷」，斬咗倉，瞓得安樂。今次睇錯市，希望下次睇番啱。無止蝕的炒作，係高風險行為。昨天止了蝕，今天反彈也無計。
第二招是無眼睇。你的即時反應可能係「唓」一聲，無眼睇都算係招數？無錯呀，如果你揸住的是投資倉，又覺得這些股票是大股，長揸無問題，例如係一些高息股，可以坐住收息，之前又無做任何止蝕動作，跌到咁不如唔睇，心情會比較安定些，如果日日睇，心情好難平靜，最怕早唔沽，跌到好甘近底才沽，將一些有質素的股票低價掟出街。所以唔睇好過。
第三招，追尋價值股。無論市道係幾差勁，當中都會有有價值的股票。大市不斷下跌，亦會令到有價值的股票跌到比較低的水平。在這個時候吸納，就買到便宜貨。年頭時是較差的買貨時機，去到二月、三月的時候，睇埋公司發布去年，便會更加清楚，在2015年經濟比較差的年頭，公司的表現如何，要見到公司在經濟環境差的時候，仍有好表現，才好買。
不過，我覺得以現時這個形勢，追尋價值股，完全不用心急，因為今年不是順風順水的一年，大市跌得急，可能會反彈，但未來仍有挑戰，大市又會回軟。所以，慢慢部署揀股，再睇埋公司業績，覺得比較有把握時才出手也未遲。當然你短炒博反彈就另計，跌咁多隨時都有大反彈。
陸羽仁
** 博客文章文責自負,不代表本公司立場 **
