今年愚人節，有好多關芫茜囗味嘅食物，都限時推出市場，香港有IKEA「芫茜豆腐新地配皮蛋脆脆」、台灣有KFC「香菜爆擊蛋撻」，就算食唔到，都要網上起哄下，芫茜好似係飲食界嘅「流量密碼」，成為「你唔食都要請朋友食」系列之首。
面對呢啲產品，反應通常好兩極：有人興奮到即刻衝去買；有人就即刻皺眉留言：「放過我啦！」究竟點解同一棵草，會令人有咁極端嘅反應？係咪有人扮嘢？定係真係有科學根據？答案可能喺你嘅 DNA 入面。
其實呢一切都係基因作怪。科學家發現，人類第 11 號染色體上有個叫OR6A2 嘅基因，佢就好似你鼻入面嘅「芫茜探測器」，專門偵測芫茜入面嘅「醛類化合物」。問題係，每個人嘅 OR6A2 基因版本都有少少唔同。如果你嘅基因屬於特定變異版，你對「醛類」會極其敏感，大腦仲會將呢種訊號解讀成「番梘味」、「臭蟲味」或者「濕毛巾味」。相反，如果你冇呢個變異，你聞到嘅就會係清新嘅草本香氣。
換句話講，如果你好憎芫茜，你真係唔係扮嘢，純粹係因為你同擁護者聞到嘅，根本係兩樣嘢。據統計，全球約 15% 至 21% 嘅人自帶呢種「反芫茜基因」，而喺東亞地區比例特別高，差唔多每 5 個香港人就有 1 個係「芫茜宿敵」。班「反對派」仲將每年2 月 24 日定為「世界討厭香菜日」，全球有成 20 幾萬人一齊慶祝。
咁點解「芫茜控」又會咁瘋狂？研究發現，比起「反芫茜派」對味道嘅單一排斥，愛好者更傾向接受複雜嘅風味組合。如果你係鍾意食芫茜，代表你嘅大腦已經成功解鎖咗一種令好多人望而生畏嘅「獨門香氣」。
如果你目前仲係好憎芫茜，但又非常好奇點解班朋友咁鍾意食，科學家都有個好消息：味覺神經係有可塑性嘅。 透過少量、反覆嘅接觸，或者將芫茜切碎嚟加速醛類分解，有啲人真係可以慢慢適應，由「不了」變成「少少 OK」。
甚至有人到咗人生後半段，會突然發現自己接受到芫茜。呢個現象都有生理基礎：隨住年紀增長，嗅覺受體會慢慢退化，原本刺鼻嘅番梘味會變得冇咁強烈，反而令你開始感受到隱藏喺後面嘅草本層次。所以，如果你由「好憎芫茜」變到「食得吓」，可能係證明你嘅大腦學識咗欣賞複雜風味，又或者係……你已經步入咗成熟穩重嘅人生階段。
下次見到朋友拼命撥走芫茜，記住呢份係佢 DNA 嘅旨意，真係冇得迫。如果想同佢一齊 enjoy？可能真係要等大家慢慢變老，等佢嘅「探測器」退化，先有機會一齊感受嗰陣「清香」！
食講究
** 博客文章文責自負,不代表本公司立場 **
復活節前夕，歐洲上演咗一單離奇嘅「朱古力大劫案」。一架滿載雀巢KitKat朱古力嘅貨車，由意大利出發前往波蘭途中，連車帶貨成架消失。總共幾多？12噸，41.3萬條，全部唔見晒。
有口痕朋友話：雀巢死對頭吉百利向來復活節都搞下marketing 尋蛋遊戲，佢哋果campaign叫「Better the Hide, Better the Hunt」，真係應曬景！全歐洲都幫手搵緊「F1特別版KitKat」！
講開復活節，點解係蛋？
復活節食朱古力蛋，大家覺得係西方傳統，但其實呢個傳統嘅歷史，冇你想像中咁耐。最早嘅復活蛋，係真雞蛋唔係朱古力！話說基督徒喺復活節前有40日「大齋期」，期間唔食得蛋。於是佢哋將呢段時間生嘅雞蛋煮熟保存，留到復活節先食，仲會將蛋殼染成紅色，象徵耶穌嘅寶血同復活嘅喜悅。
到咗19世紀，法國同德國嘅朱古力師開始用朱古力整蛋，不過最初嘅朱古力蛋又苦又硬，因為當年嘅朱古力技術未成熟。後來朱古力製作技術進步，空心朱古力蛋先普及起嚟。到1905年吉百利推出牛奶朱古力蛋，復活節食朱古力蛋呢個傳統，先正式確立。自此之後，吉百利差唔多每年復活節都會搞尋蛋活動，成為英國人嘅節日傳統。
歐洲人覺得蛋代表耶穌復活，因為蛋殼裂開、小雞破殼而出，就好似耶穌從墳墓復活一樣。德國仲有「雞蛋舞」——情侶喺蛋陣入面跳舞，冇踩爛任何一隻蛋嘅，就會受到眾人祝福。
東方都一樣。中國人傳統上，滿月、生日、喜慶日子，都會派紅雞蛋。紅色代表喜慶，亦可以辟邪保平安。據講仲有啲地區生仔送雙數紅雞蛋，生女送單數，老人家一收到就知添咗男定女。廣東鄉下地區仲有個講法，話食紅雞蛋代表「有王管」，即係有人教導，唔會學壞。
一個係慶祝耶穌復活，一個係慶祝新生命誕生。東西方文化，不謀而合用同一樣嘢嚟表達「新生」嘅喜悅——蛋。
由食落肚嘅蛋，到「搵到就開心」嘅蛋
講到呢度，不得不提一個有趣嘅語言演化：我哋而家成日講嘅「彩蛋」（Easter egg），已經唔再只係復活節嗰粒蛋。呢個詞嘅起源，正正來自復活節嘅搵蛋遊戲——將蛋藏喺花園角落，等小朋友去搵，重點係「搵到」嗰吓驚喜。後來呢個概念被借用到電影、遊戲入面，指創作者隱藏嘅小細節，等你發掘。你喺Marvel電影或者而家追緊套熱爆大陸劇等到最後，發現嗰段隱藏片段，其實都係喺度「搵緊蛋」。
無論點都好，今年未到復活節就發生奇聞，究竟係世紀玩笑定係世紀懸案暫時未知，但大家最關心，就肯定係復活節長期plan 吓約班friend 去玩、執定喼外遊定係趁機休息吓！
